Կատարը պատրաստ է միանալ ԴԱԻՇ ահաբեկչական խմբավորման դեմ հնարավոր ցամաքային գործողությանը, եթե դրա մասին խնդրի Սաուդյան Արաբիան։ Այս մասին հայտնում է «Ալ-Շարկ Ալ-Աուսատ» պարբերականը՝ հղում անելով Կատարի պաշտպանության հարցերով պետնախարար և նախկին արտգործնախարար Խալիդ Ալ-Աթիյային՝ փոխանցում է RIA Novosti-ն։
Ինչպես թերթին հայտնել է նախարարը՝ կատարցի զինվորները պատրաստ են կողք կողքի կռվել Սաուդյան Արաբիայի և ԱՄԷ-ի ընկերների հետ, եթե «դրա մասին խնդրի Էր-Ռիադը»։
Ալ-Աթիյան նշել է, որ դեռևս անցած հոկտեմբերից Կատարն այն կարծիքին է, որ եթե սիրիացի ժողովրդի պաշտպանության համար ցամաքային ներխուժում պահանջվի, ապա պետք է իրականացնել այն։
Սաուդյան Արաբիայի իշխանություններն ավելի վաղ հայտարարել էին, որ ահաբեկչության դեմ պայքարի ջանքերի շրջանակում պատրաստ են զինվորականներ ուղարկել Սիրիա՝ այն դեպքում, եթե հնարավոր գործողությանը համաձայնություն տա ԱՄՆ գլխավորած միջազգային կոալիցիայի հրամանատարությունը։
Ինչպես Al Arabiya հեռուստաալիքին հայտնել է թագավորության պաշտպանության նախարարի խորհրդական Ահմեդ Ասիրին, այդ մասին ձեռք է բերվել սկզբունքային համաձայնություն։
Ավելի վաղ Սաուդյան Արաբիային միանալու պատրաստակամություն էին հայտնել ԱՄԷ-ն և Բահրեյնը։
