Google Inc-ը մտադիր է երաժշտական նոր առցանց ծառայություն ստեղծել, որը կմրցակցի տարածված Spotify սթարթափի հետ: Այս մասին է նշվում The Verge բլոգում տեղադրված հոդվածում:
Կորպորացիան արդեն լիցենզավորված համաձայնագրեր է կնքել Universal Music Group-ի և Sony Music Entertainment-ի հետ: Google-ը մտադիր է ծառայությունը բաժանորդագրությամբ մատուցել: Ինչպես նշվում է հոդվածում, իր ծրագրերն ընկերությունը կարող է հրապարակել չորեքշաբթի օրը՝ ծրագրեր մշակողների տարեկան կոնֆերանսում:
Ավելի վաղ Google-ը Warner Music Group-ի երաժշտության տարածման պայմանագիր էր ստորագրել:
Համացանցում երաժշտություն լսելը վերջին տարիներին ավելի տարածված է, քան առանձին երգեր գնելը կամ դրանք ներբեռնելը:
Հարկ է նշել, որ Reuters գործակալության աղբյուրների հավաստմամբ՝ Apple Inc-ը երաժշտական լեյբլների հետ iTunes-ի բաժանորդագրման շուրջ բանակցություններ է վարում:
Վերջերս տեղեկացվել է նաև, որ Google-ը դադարեցրել է SMS Search ծառայությունը:
