Թուրքական T24 թերթի փոխանցմամբ՝ «Ազգայնական շարժում» կուսակցության (ԱՇԿ) նախագահի թեկնածու Մերալ Աքշեները չի բացառել, որ հետագայում կարող է դառնալ երկրի վարչապետ։ Աքշեները դա հնարավոր է համարել ԱՇԿ նախագահի պաշտոնում ընտրվելու դեպքում, և որ ԱՇԿ-ն իր գլխավորությամբ մեծ հաջողություններ կարձանագրի։
Նա հայտարարել է, որ չի հանդիպել ԱՇԿ ներկայիս նախագահ Դևլեթ Բահչելիին այն բանից հետո, ինչ նա հունվարին ենթարկվեց սրտի վիրահատության։ Խոսելով Բահչելիի այն մեղադրանքի մասին, թե կապեր է պահպանում գյուլենականների հետ՝ Աքշեները հայտարարել է, որ Ֆեթհուլլահ Գյուլենի հետ հանդիպել է 2 անգամ, սակայն 2011 թվականի խորհրդարանական ընտրություններից հետո չի շփվել նրա հետ։
Հիշեցնենք, որ ԱՇԿ-ի համագումարն անցկացվելու է 2018 թվականի մարտին։ Հայտնի հայատյաց գործիչներ Մերալ Աքշեներն ու Սինան Օղանը համարվում են ԱՇԿ-ի նախագահի պաշտոնում Բահչելիին փոխարինելու հիմնական հավակնորդներ։ Բահչելին փորձում է կարգապահական խախտումների քողի ներքո Աքշեներին ու Օղանին հեռացնել կուսակցության շարքերից։
1997 թվականին Աքշեները Թուրքիայի խորհրդարանում PKK առաջնորդ Աբդուլլահ Օջալանին անվանել էր «Հայի սերունդ», ապա «ներողություն էր խնդրել» դրա համար՝ ընդգծելով, որ «նկատի է ունեցել ոչ թե Թուրքիայում ապրող հայերին, այլ՝ ընդհանրապես Հայկական ռասային»։
