«Հայբիզնեսբանկ»-ի վարչության նախկին նախագահ Արա Կիրակոսյանը, այսօրվանից հացադուլ է սկսել։ Այս մասին «Առաջին լրատվական»-ի հետ զրույցում ասաց Կիրակոսյանի պաշտպանը՝ Հակոբ Ճարոյանը։
Բանն այն է, որ 11 միլիոն եվրո գումարի լվացման գործով արդեն 1 տարի է դատական նիստերը տարբեր պատճառաբանությամբ չեն կայանում։ Նախորդ 3 նիստը չի կայացել մեղադրող դատախազի չներկայանալու պատճառով, իսկ ավելի վաղ բազմաթիվ նիստեր հետաձգվել են մեղադրյալներից մեկի՝ բանկի վարչության նախագահի տեղակալ, Տարածքային զարգացման և տեղեկատվական տեխնոլոգիաների դեպարտամենտի տնօրեն Մելիք Եսայանի հիվանդության պատճառով։
Փաստաբանը մեզ հետ զրույցում ասաց, որ իր պաշտպանյալը՝ Արա Կիրակոսյանն արդեն երկու տարի է՝ ինչ անազատության մեջ է: Իսկ մեկ տարի է՝ գործը դատարանում է, սակայն, բացի դատավորի և դատախազի ինքնաբացարկի միջնորդություններից, դեռևս ոչ մի ուրիշ հարց չի քննվել դատարանում և գործն այդպես էլ դատաքննության փուլ չի մտնում։
Արա Կիրակոսյանն իր հացադուլ սկսելու քայլով ուշադրություն է սևեռում իր գործի վրա։ Նա և իր պաշտպանյալը պնդում են, որ քրեական գործն անհիմն է, իսկ դատական նիստերի հետաձգումներով էլ ավելիէ երկարացվում Կիրակոսյանի անազատության մեջ գտնվելու ժամանակը։
Հիշեցնենք, որ Արա Կիրակոսյանին մեղադրանք է առաջադրվել այն բանի համար, որ նա 2006թ. օգոստոսի 21-ից մինչև 2013 թվականի հոկտեմբերի 1- ը, հանդիսանալով «Հայբիզնեսբանկ» ՓԲԸ-ի վարչության նախագահը, բանկի հաստատված կանոնադրությամբ սահմանված իր կարգադրիչ և այլ լիազորություններն այդ կազմակերպության շահերին հակառակ՝ իր և ուրիշ անձանց օգտին օգտագործելով, նույն բանկի վարչության նախագահի տեղակալ, Տարածքային զարգացման և տեղեկատվական տեխնոլոգիաների դեպարտամենտի տնօրեն Մելիք Եսայանի, Իրանի և ԱՄՆ քաղաքացի Մաջիդ Ռ Նազիֆի, ԻԻՀ և ԱՄՆ քաղաքացի, ՀՀ-ում գրանցված «Ալֆա Զեներալ Թրեյդինգ» ՍՊԸ հիմնադիր տնօրեն Բեհրուզ Բեհնամի, ԻԻՀ և ՀՀ քաղաքացի Վահիկ Մանուկյանսի, Շվեյցարիայի Համադաշնության Ժնև քաղաքում գրանցված, «Կոսմոս Տրադինգ» ընկերության հիմնադիր, ՀՀ քաղաքացի Անդրանիկ Դոների, վերջինիս կողմից լիազորված անձ՝ Սուրեն Գաբրիելյանի և ՀՀ-ում գրանցված «Դավ Տրանս Ստրոյ» ՍՊԸ հիմնադիր֊ տնօրեն, ՀՀ քաղաքացի Դավիթ Դերզյանի հետ, մի խումբ անձանց կողմից նախնական համաձայնությամբ, 2012 թվականի օգոստոսից մինչև 2013 թվականի մարտ ժամանակահատվածում, օգտագործելով իրավունք վերապահող պաշտոնական փաստաթղթեր հանդիսացող կեղծ պայմանագրեր և վճարման հանձնարարականներ, խարդախությամբ՝ խաբեության եղանակով հափշտակել, ապա օրինականացրել են Ռուսաստանի Դաշնության Մոսկվա քաղաքում գործող «Միր Բիզնես Բանկ» ՓԲ ընկերության կողմից, «Սբերբանկ» ՓԲ ընկերության միջոցով (միջնորդությամբ), «SWIFT» համակարգով «Հայբիզնեսբանկ» ՓԲ ընկերություն (այսուհետ սույն որոշման մեջ կարող է նշվել նաև բանկ) փոխանցված առանձնապես խոշոր չափերով ընդհանուր 5.804.577.000 ՀՀ դրամին համարժեք 10.980.000 եվրո գումար, որից՝ 1.000.000 եվրոն նախատեսված է եղել գումարի իրական շահառու, բանկում թղթակցային հաշվեհամարներ բացած, ԻԻՀ «Քիշ Ինտերնեյշնլ Բանկ» ընկերության համար, իսկ 9.980.000 եվրոն՝ «SWIFT» հաղորդագրություններում անճշտություններ լինելու և վերջնական շահառուն նշված չլինելու պատճառով, ենթակա Է եղել վերադարձման ուղարկող «Միր Բիզնես Բանկ» ՓԲ ընկերությանը, որի հետևանքով «Քիշ Ինտերնեյշնլ Բանկ» և «Միր Բիզնես Բանկ» ՓԲ ընկերություններն իրավունք են ձեռք բերել նույն չափով գումարներ ստանալու հայցապահանջ երկայացնել «Հայբիզնեսբանկ» ՓԲ ընկերության նկատմամբ, որը հատուցման պարտավորություն Է ստանձնել։
