Վատիկանն առաջին անգամ կմասնակցի Վենետիկյան բիենալեին, որի տաղավարը կգործի հունիսի 1-ից նոյեմբերի 24-ը: Էքսկուրսավար է նշանակվել Վատիկանի թանգարանների տնօրեն Անտոնիո Պաոլուչին: Այս մասին հայտնում է Վատիկանի ռադիոն՝ հղում անելով մշակութային հարցերով Պապի խորհրդի ղեկավար, կարդինալ Ջանֆրանկո Ռավազիին:
Ռավազիի խոսքով՝ ցուցադրությունը աշխարհին պետք է հիշեցնի «արարման առեղծվածի, պատմության մեջ չարի մուտքի, մարդկանց հույսերի ու ծրագրերի մասին»:
Ցուցադրությունը կբաժանվի երեք մասի՝ նվիրված աշխարհի ստեղծմանը, կործանմանն ու վերափոխմանը: «Ստեղծում» ցուցադրությունը կպատրաստի Միլանի Studio Azzurro-ն, որը ժամանակակից տեխնոլոգիաների օգնությամբ կստեղծի ինտերակտիվ իլյուստրացիա: Կործանման մասին կպատմի չեխ լուսանկարիչ Յոզեֆ Կուդելկան՝ սև ու սպիտակ լուսանկարների լեզվով: Աշխարհի վերափոխումը իր ստեղծագործությամբ կներկայացնի ամերիկացի նկարիչ Լոուրենս Քերոլը: Նա իր գլուխգործոցները կերտում է մարդկանց կողմից դեն նետված իրերից:
Վատիկանից բացի՝ 55-րդ Վենետիկյան բիենալեին առաջին անգամ կմասնակցեն նաև Բահամյան կղզիները, Բահրեյնը, Կոսովոն, Քուվեյթը, Մալդիվները, Կոտ դ՝Իվուարը, Նիգերիան ու Պարագվայը:
