Օրերս Սերժ Սարգսյանի հրամանագրով մի շարք դատարաններում նոր նշանակումներ են կատարվել, որոնցից մեկի կենսագրականը գրավել է հանրության ուշադրությունը։ Ըստ պաշտոնական հաղորդագրության Սյունիքի մարզի ընդհանուր իրավասության դատարանի դատավոր նշանակված Դավիթ Սարգսյանը 2001 թվականին ավարտել է Սևանի «Մխիթար Սեբաստացի» համալսարանը և ստացել իրավաբանի որոկավորում: Իսկ այդ ընթացքում, ուսնելուն զուգահեռ՝ աշխատել է «Սևանի սպորտային կոշիկների ֆաբրիկայում»։ Փաստաբան Հայկ Ալումյանը, սակայն, որեւէ զարմանալի բան չի տեսնում նրանում, որ Սևանում մասնավոր բուհ ավարտած և տևական ժամանակ կոշիկի ֆաբրիկայում որպես պահակ աշխատած Դավիթ Սարգսյանը նշանակվել է Սյունիքի մարզի ընդհանուր իրավասության դատարանի դատավոր։
Թե ինչ որակի արդարադատություն կարող է իրականացնել այդպիսի անձը, փաստաբանի խոսքով, շատ արագ պարզ կդառնա, երբ հրապարակվեն նրա քննած գործերով առաջին վճիռները։ Մինչ այդ ըստ նրա՝ պետք չէ շտապել կարծիք հայտնել։
Ալումյանը կողմնակից է, որ դատական համակարգը համալրվի երիտասարդ դատավորներով։ Փաստաբանը միարժեք չի համարում այն պնդումը, որ երկար տարիների կենսափորձ ունեցող դատավորներն ավելի լավ վճիռներ են կայացնում, քան երիտասադները։
Ալումյանը չի ցանկանում անուններ թվարկել, բայց նրա խոսքով, այսօր եթե կան դատավորներ, որոնց հետ կարելի է հույս կապել, ովքեր աչքի են ընկնում պրոֆեսիոնալիզմով, հենց երիտասարդ սերնդի դատավորներն են։
Երիտասարդ փաստաբան Երվանդ Վարոսյանի համոզմամբ էլ միայն երիտասարդ ու պատրաստված կադրերով դատական համակարգը չի առողջանա։ Դրա համար քաղաքական կամք է պետք։ Բայց վստահաբար, փաստաբանի խոսքով, այսօր կան երիտասարդ դատավորներ, ովքեր վճիռ կայացնելուց չեն վազում վճռաբեկ դատարան, կամ այն համաձայնեցնում «վերևների» հետ։
Ազգային ժողովի պետաիրավական հանձնաժողովի նախագահ Հովհաննես Սահակյանը ևս խնդիր չի տեսնում անփորձ երիտասարդներին դատավորի պաշտոնում նշանակելու մեջ։ ։ Նրա խոսքով դատավորները մինչև նշանակումը անցնում են մի շարք ատյաններով, վերապատրաստվում են։ Դրանից հետո դժվար է կասկածի տակ առնել նրանց մասնագիտական որակները։ Հովհաննես Սահակյանի համոզմամբ, Սահմանադրական փոփոխություններից հետո ունենալու ենք լրիվ այլ որակի դատական համակարգ։
