Երեկ ազատ արձակվեց քաղբանտարկյալ, ՀՀՇ վարչության անդամ, ՀՀՇ Հրազդանի կառույցի ղեկավար Արամ Բարեղամյանը: Վերջինս ազատ արձակվելուց հետո այցելել է Վանատուր գյուղ` քաղբանտարկյալ, ԱԺ նախկին պատգամավոր Սասուն Միքայելյանի գրասենյակ` շուտափույթ ազատ արձակում մաղթելով նրան: Այնուհետև Հայ ազգային կոնգրեսի անդամները Հրազդանում ավտոերթ են անցկացրել և ուղևորվել Բարեղամյանի տուն: Արամ Բարեղամյանը երեկ պատասխանեց < հարցերին:
– Պարոն Բարեղամյան, ինչպե՞ս կմեկնաբանեք Ձեզ ազատ արձակելու որոշումը, ինչո՞վ էր դա պայմանավորված:
– Իմ ազատ արձակումը եղավ ժողովրդի հետևողական պայքարի շնորհիվ: Երբ Եվրոպական կառույցներն արձագանքեցին քաղբանտարկյալների թեմային, արեցին միայն ժողովրդի պայքարի արդյունքում: Չլիներ այդ պայքարը, չէր լինի նաև այդ արձագանքն ու ազատ արձակումը: Մենք ապացուցեցինք, որ ժողովուրդ ենք, և մեր ազատ ապրելու իրավունքը մենք ենք որոշում: Եվ այդ ուժի հետ հաշվի նստեց ե՛ւ միջազգային հանրությունը, ե՛ւ այս ոչ լեգիտիմ իշխանությունը: Սակայն ուզում եմ շեշտել, որ քաղբանտարկյալների հարցը միայն բարոյական հարթության մեջ է, բայց մենք ունենք քաղաքական մեկ մեծ նպատակ, մեկ հիմնական գործ` ՀՀ-ում Սահմանադրական կարգի վերականգնումը: Հայ ազգային կոնգրեսը ՀՀ առաջին նախագահ Լևոն Տեր-Պետրոսյանի գլխավորությամբ այս երեք տարիների ընթացքում արեց այնպես, որ բարոյական հարցն ու քաղաքական հարցը չտուժեցին. նա չհենվեց ոչ մեկի վրա, այլ` երկու դաշտում էլ պայքարը հավասար առաջ տարավ: Ու իմ կարծիքով, շուտով տեսնելու ենք վերջնական հաղթանակը:
– Ինչո՞ւ համաներումից հետո իշխանությունները շարունակաբար ոչինչ չէին անում քաղբանտարկյալներին ազատ արձակելու համար. ընդամենը ԵԽԽՎ նիստերից առաջ մեկ-երկու հոգու բաց էին թողնում և սահմանափակվում դրանով: Իսկ հիմա կարծես թե մտադիր են ազատ արձակել բոլորին: Համենայնդեպս, նման խնդրանքով իշխանական տարբեր գործիչներ արդեն դիմում են Սերժ Սարգսյանին:
– Սկզբում` մեզ կալանավորելով իշխանությունները նպատակ ունեին այդպես վախեցնել ժողովրդին: Սա ինչ-որ տեղ ազդեցություն ունեցավ, բայց շատ քիչ էր ազդեցությունը: Սակայն հետագայում, երբ ժողովուրդը ոտքի կանգնեց, իր հետևողական պայքարով կարողացավ ստիպել իշխանություններին հաշվի նստել իր հետ:
– Լևոն Տեր-Պետրոսյանը 15-կետանոց պահանջներից առանձնացրեց երեք հիմնականը` պահանջելով այս փուլում դրանք իրագործել` այլապես սպառնալով, որ վերջնական ջրբաժան կլինի իշխանությունների և ընդդիմության միջև: Իշխանությունները կատարեցին պահանջներից երկուսը, երրորդի մասին տվել են հստակ խոստում: Ձեր կարծիքով, իշխանությունների և ընդդիմության միջև երկխոսություն կլինի՞, թե՞ ոչ, և արդյո՞ք այդ երկխոսության արդյունքում կհասնենք իշխանափոխության:
– Մեր պայքարը միշտ եղել է քաղաքակիրթ, և մեր այդ գիծը երբեք չի փոխվել: Ինչպես ասում էր ՀՀ առաջին նախագահը` մենք շախմատ ենք խաղում, իրենք` քիգ-բոքս: Սակայն ոչ լեգիտիմ իշխանությունների վերջին գործողությունները համաժողովրդական պայքարի շնորհիվ տեղափոխվեցին շախմատային դաշտ: Եվ հիմա իշխանությունները ժողովրդի ճնշման տակ շախմատ են խաղում, շախմատային քայլեր անում: Ես կարծում եմ` այսօր երկխոսությունն անհրաժեշտ է, որովհետև մենք տեսել ենք ամեն ինչ, տեսել ենք վայրենություններ` ե՛ւ գնդակահարություն, ե՛ւ բանտարկություն, ե՛ւ կանանց դեմ հարձակումներ և այլն: Բայց նրանք մեր հետևողական պայքարի արդյունքում այդ վայրենություններից անցել են քաղաքակիրթ քայլերի: Հիմա երկխոսության արդյունքում էլ կորոշենք հետագա անելիքները: ՀՀ առաջին նախագահ Լևոն Տեր-Պետրոսյանի և Հայ ազգային կոնգրեսի գլխավորությամբ, կարծում եմ, հասնելու ենք մեր հիմնական նպատակին` երկրում սահմանադրական կարգի վերականգնմանը:
– Ձեր կարծիքով, իշխանությունները մայիս ամսվա ընթացքում արդյո՞ք ազատ կարձակեն մյուս քաղբանտարկյալներին ևս:
– Մեզ պահելն իշխանությունների դեմ է աշխատում: Քաղբանտարկյալներին պետության հաշվին են պահում` պետությունը վարկաբեկելով, պետությունը ետ շպրտելով և այլն: Ու կարծում եմ` իշխանությունները հասկացան, որ այդպես այլևս հնարավոր չէ ժամանակ շահել, հնարավոր չէ շարունակել: Ու հատկապես վերջին հանրահավաքների ուժը տեսնելով` նրանք ստիպված եղան հաշվի նստել փաստերի հետ: Կարծում եմ` հետագա հզոր ալիքի դեպքում կլինի նաև հրաժարական:
– Բանտից դուրս գալուց հետո ի՞նչ եք պատրաստվում անել, շարունակելո՞ւ եք պայքարը:
– Այո՛, միանշանակ: Երկրորդ կարծիք չկա: Վաղվանից ես մտնում եմ աշխատանքի` 24 ժամ շարունակ: Այլ ելք մենք չունենք, որովհետև Հայաստանը հայաթափվում է, իսկ դա աղետ է մեր ազգի համար: Բոլորն են գիտակցում, որ ժամանակ չունենք, այլապես երկիրը կկործանվի: Ուստի պետք է պայքարենք: