Նոր Օռլեանի ոստիկանությունը հրապարակել է հսկիչ տեսախցիկի կատարած տեսագրությունը, որն արձանագրել է Մայրերի օրվա շքերթի ժամանակ տեղի ունեցած հրաձգությունը, որի հետևանքով 19 մարդ է տուժել, նրանցից երկուսը՝ 10 տարեկան երեխաներ:
Տեսագրության մեջ պարզ երևում է կրակողներից մեկը՝ սպիտակ վերնաշապիկով սևամորթ երիտասարդը: Չնայած տեսագրության որակը բավականին ցածր է, և հանցագործի դեմքը չի երևում՝ իրավապահները հուսով են, որ որևէ մեկը կճանաչի նրան, տեղեկացնում է Sky News-ը: Կասկածյալին ձերբակալելու հնարավորություն տվող տեղեկատվության համար ոստիկանությունը 10 հազար դոլար պարգևատրում է խոստացել:
Իրավապահները մինչ այժմ չգիտեն, թե կրակողները քանիսն են եղել: Հնարավոր է, որ հրաձգությունը երկու զենքից է կատարվել: Ինչպես ավելի վաղ նշվում էր, տոնակատարության ժամանակ հերթապահող ոստիկանները տեսել են դեպքի վայրից փախչող երեք կասկածյալների:
Ոստիկանության տվյալներով՝ տոնակատարության ժամանակ տուժածներից շատերի վնասվածքները թեթև են և կյանքին չեն սպառնում: Տուժածներից երկուսը վիրահատվել են:
Ավելի վաղ, կիրակի օրը ՀԴԲ-ն հայտարարել էր, որ հրաձգությունն ահաբեկչական գործողություն չէր, այլ՝ փողոցային հանցագործություն։
