Մայիսի 14-ին Երևանի Կենտրոն և Նորք-Մարաշ վարչական շրջանների ընդհանուր իրավասության դատարանում կկայանա ՀՀ նախագահի նախկին թեկնածու, ԱԻՄ առաջնորդ Պարույր Հայրիկյանի սպանության փորձի գործով առաջին դատական նիստը՝ դատավոր Գագիկ Պողոսյանի նախագահությամբ: Սակայն, ըստ Վարդան Սեդրակյանի պաշտպան Ալեքսանդր Սիրունյանի, գործը թերի է քննված, մի շարք կարևորագույն հանգամանքներ հաշվի չեն առնվել: Ալեքսանդր Սիրունյանը նշել է, որ չեն կարողանում հասկանալ, թե ինչպես է 7.62 տրամաչափի գնդակը Հայրիկյանի մարմնի վրա թողել 1-2 սմ անցք: Նրա համոզմամբ՝ դա հնարավոր չէր, քանի որ նրա ուսումնասիրությունների արդյունքում պարզվել է, որ նագանը 200 մետրից 2,5 սմ անցք է բացում:
«Իսկ 35 քայլից՝ 25 մետրից՝ 7,5 սմ: Ու նման բազմաթիվ թերություններ կան, որ մենք ասում ենք՝ ինչո՞ւ սա չի պարզվել»,- նկատել է նա: Վերջինիս խոսքով՝ ի՞նչ սպանություն է դա, 60 սմ-ից չե՞ն կարողացել Հայրիկյանի սրտին կամ գլխին կրակել: Ուստի, նրա համոզմամբ, քննությունը թերի է, իսկ դատական առաջին նիստին միջնորդելու է, որ խափանման միջոց ընտրված կալանքը փոխվի:
«Առաջին լրատվական»-ի հետ զրույցում գործարար, հասարակական-քաղաքական գործիչ, Պարույր Հայրիկյանի ընկեր և նրա նախկին շտաբի միջազգային հարցերով պատասխանատու Կարո Եղնուկյանը նշեց, որ քննությունը լավ է ընթացել: Բայց, նրա համոզմամբ ևս, կան բացթողումներ և թերություններ:
«Վարդան Սեդրակյանը չի խոսում: Երբ դատապաշտպանը բողոքում է, որ քննությունը թերի է, քննության ամբողջականության համար պետք է Վարդան Սեդրակյանն իր իմացածն ասեր, թեև իր իրավունքն էր չխոսելը և ցուցմունք չտալը: Երբ փաստեր են առաջադրում՝ ասելով, թե թերի է, թող Վարդան Սեդրակյանը խոսեր, անդրադառնար, պարզաբաներ, որ քննության պատկերն ամբողջական լիներ: Այն, որ այդ երկու անձինք մատնացույց են անում նրան, պատրաստ են դատարանում ցուցմունք տալ՝ քննության արդյունքն է»,- նշեց Կարո Եղնուկյանը:
Վերջինիս կարծիքով՝ թերի է եղել քննությունը Վարդան Սեդրակյանի ֆինանսական միջոցների ձեռք բերման մասին տվյալների մասով: Ըստ Եղնուկյանի՝ նման քրգործերում կարևոր է, թե ով է եղել պատվիրատուն, գումարը վճարողը, ուստի կարևոր է՝ որտեղից են ձեռք բերվել ֆինանսական միջոցները: Այս գործի իրական պատվիրատուի անունը, նրա խոսքով, կարող էր ասել միայն Վարդան Սեդրակյանը, ուստի քննության ամբողջականության համար նա պետք է խոսեր:
Հիշեցնենք, որ Տպագրիչների 9 հասցում հունվարի 31-ին, ժամը 23.30-ին, իր տան դիմաց նախագահի թեկնածու, ԱԻՄ նախագահ Պարույր Հայրիկյանի դեմ մահափորձ էր կատարվել: Պարույր Հայրիկյանին տեղափոխել էին «Սուրբ Գրիգոր Լուսավորիչ» բժշկական կենտրոն, որտեղ նրան հաջողությամբ վիրահատել էին:
Պարույր Հայրիկյանի դեմ մահափորձի դեպքի առթիվ հարուցվել էր քրեական գործ՝ ՀՀ ՔՕ 34-305 հոդվածի հատկանիշներով: Այդ հոդվածներով սահմանվում է պետական, քաղաքական կամ հասարակական գործչի սպանության հանցափորձը, որը կատարվել է նրա՝ նշված գործունեությունը դադարեցնելու նպատակով: Այն պատժվում է ազատազրկմամբ` 12-20 տարի ժամկետով, կամ ցմահ ազատազրկմամբ: Նախաքննությունը վարում է Ազգային անվտանգության ծառայությունը, ստեղծվել էր ոստիկանության և ազգային անվտանգության ծառայության համատեղ օպերատիվ քննչական խումբ:
Նշենք նաև, որ այս գործով մեղադրվում են նախագահի մեկ այլ նախկին թեկնածու՝ էպոսագետ Վարդան Սեդրակյանը, և նախկինում նրա աշխատակիցներ Խաչատուր Պողոսյանը և Սամվել Հարությունյանը: Ըստ Datalex.am տեղեկատվական կայքի՝ այս գործով մեղադրական եզրակացության համաձայն, Վարդան Սեդրակյանին մեղադրանք է առաջադրվել, քանի որ նա իր մտերիմներին՝ Սամվել Հարությունյանին և Խաչատուր Պողոսյանին, պատվիրել է ԱԻՄ առաջնորդ, ՀՀ նախագահի նախկին թեկնածու Պարույր Հայրիկյանի սպանությունը՝ նրա քաղաքական գործունեությունը դադարեցնելու նպատակով: Սա, ըստ մեղադրական եզրակացության, իրականացնելու նպատակով Վարդան Սեդրակյանը զենք ձեռք բերելու համար հանցակիցներին տվել է 1000 դոլար, ինչը նրա աշխատակիցները կիսել են միմյանց միջև:
Սակայն, ըստ այդ նույն եզրակացության, հանցագործության համար Խաչատուր Պողոսյանն օգտագործել է իր կողմից 1995-1996թթ. ապօրինի կերպով ձեռք բերված և պահված 1941թ. գործարանային արտադրության 7,62մմ տրամաչափի «HG 201» համարի «Նագան» տեսակի թմբուկավոր ատրճանակը:
