Հոգեկան շեղումները, այդ թվում՝ շիզոֆրենիան ու երկբևեռ խանգարումը չի կարելի բուժել այնպես, ինչպես սովորական հիվանդությունները՝ գրում է The Daily Mail-ը՝ հղում կատարելով բրիտանացի առաջատար հոգեբաններին:
Ըստ փորձագետների՝ անգամ հոգեկան վիճակի դասակարգումն է անիմաստ, քանի որ ապացուցված չէ, որ «պոռթկումը» կամ «էմոցիոնալ լուրջ ցնցումը» որևէ կապ ունեն գենետիկ կամ կենսաբանական պատճառներով ծագող հիվանդությունների հետ: Այս մասին ասվում է Բրիտանական հոգեբույժների միության կլինիկական հոգեբանության բաժնի տարածած հայտարարության մեջ:
Ինչպես հայտարարել է դիմումի հեղինակներից Լյուսի Ջոնսթոունը, անհրաժեշտ է նոր մոտեցում, որի համաձայն՝ բոլոր նրանց, ովքեր տառապում են հոգեկան շեղումներով, կընկալեն որպես «խնդիրներ ունեցող մարդիկ», ոչ թե «հիվանդություններով տառապողներ»:
«Մարդիկ պոռթկումներ են ունենում այն ամենի արդյունքում, ինչ է տեղի ունենում իրենց կյանքում: Ու մենք մինչև չհասկանանք այդ պատճառները, չենք կարողանա նրանց ճիշտ օգնություն ցուցաբերել»,- ասել է Ջոնսթոունը:
«Հարցն այն է՝ կա՞ն արդյոք ապացույցներ, որ հոգեկան շեղումները հարուցվում են գլխավորապես մեր գլխուղեղում կամ մեր մարմնում: Ապացույցներ չկան, և դա ընդունում են առաջատար հոգեբանները»,- հավելել է նա:
