ԱՄՆ Լուիզիանա նահանգի Նոր Օռլեան քաղաքի փողոցներից մեկում անհայտ անձինք կրակ են բացել Մայրերի օրվան նվիրված շքերթին հետևող մարդկանց վրա: Համաձայն հստակեցված տվյալների՝ արդյունքում վիրավորվել է 19 մարդ: Այս մասին կիրակի օրը հայտնել է քաղաքային ոստիկանության ներկայացուցիչը:
«Վիրավորների թվում են 2 երեխաներ՝ 10-ամյա տղա և աղջիկ: Տուժածներից 3-ը ծանր վիճակում տեղափոխվել են հիվանդանոց»,- ասել է նա:
«Օգտվելով ականատեսների վկայություններից՝ մեզ հաջողվել է պարզել, որ կրակել են 3 անձ: Շքերթի մասնակիցների՝ 300-400 մարդու վրա կրակ է բացվել 2 տիպի հրազենից: Դեռևս հայտնի է միայն, որ հարձակվողներից մեկը 18-22 տարեկան է»,-հայտարարել է Նոր Օռլեանի շերիֆը:
Նշվում է, որ ներկայումս քաղաքային ոստիկանությունը զբաղված է հանցագործների որոնումներով:
