Իրանի իշխանությունները վճռական կերպով դատապարտում են քիմիական զենքի կիրառումը: Այս մասին հայտարարել է Իրանի ԱԳ նախարար Ալի Աքբար Սալեհին՝ Der Spiegel գերմանական պարբերականի հետ հարցազրույցի ընթացքում:
«Մենք դատապարտում ենք քիմիական զենքի կիրառումը: Թեհրանը կտրականապես դեմ է զանգվածային ոչնչացման ցանկացած զենքի»,- ասել է Սալեհին:
Նրա խոսքերը հնչել են այն բանից հետո, երբ ԱՄՆ-ը հայտարարել է, որ գոյություն ունեն «ծանրակշիռ ապացույցներ», որ Սիրիայում թունավոր գազ է կիրառվել: Սակայն համակարտության կողմերից որ մեկն է այն կիրառել, հայտնի չէ:
Իրանի արտգործնախարարը նաև հայտարարել է, որ իր երկիրը ցանկանում է մասնակցել Սիրիայի վերաբերյալ միջազգային կոնֆերանսին:
