Google ընկերությունը ներկայացրել է Timelapse նախագիծը, որը թույլ է տալիս իմանալ, թե վերջին 28 տարիների ընթացքում ինչպես է փոխվել երկրագնդի տեսքը: Նախագծի մասին հաղորդվում է Google-ի պաշտոնական բլոգում:
Timelapse-ն իր մեջ ներառում է ինտերակտիվ պատկերներ՝ HTML5 ձևաչափով: Դրանք կազմված են ժամանակագրական առումով միմյանց հաջորդող լուսանկարներից, որոնք արվել են Landsat արբանյակներով 1984-2012 թթ.: Նախագծի հիմքում ընկած է Google Earth Engine-ը:
Օգտատիրոջն առաջարկվում են ընտրված ութ պատկերներ, սակայն Երկրի այլ կետերում տեղի ունեցած փոփոխություններին ևս կարելի է հետևել:
Նախագիծը ստեղծելու համար Google-ը համագործակցել է ԱՄՆ-ի Երկրաբանական վարչության, NASA-ի, The Time ամսագրի և Կարնեգի-Մելոն համալսարանի հետ: Նախագծի համար լուսանկարներն ընտրվել են արբանյակային լուսանկարների ավելի քան 2 միլիարդանոց հավաքածուից։
