Ռուսաստանի նախագահ Վլադիմիր Պուտինը լի է վճռականությամբ՝ թույլ չտալ այնպիսի հին դաշնակիցներին, ինչպիսին է Սիրիան, հայտնվել իր արևմտյան մրցակիցների ձեռքում՝ գրում է The Telegraph-ը:
Հավանական է, որ Սոչիում Մեծ Բրիտանիայի վարչապետ Դևիդ Քեմերոնի հանդիպումը Ռուսաստանի առաջնորդի հետ ծանրաբեռնված կլինի ինտելեկտուալ խաղերով, սակայն այն կարող է նպաստել Սիրիայում քաղաքացիական պատերազմի ավարտին՝ կարծում է պարբերականը:
Ինչպես նշվում է հոդվածում, ռուս-բրիտանական հարաբերությունները վերջին ժամանակներս կրում են բավականին խնդրահարույց բնույթ, այդ պատճառով Քեմերոնը պետք է պատրաստ լինի անհարմար իրավիճակների:
Հոդվածագիրները կարծում են, որ Մեծ Բրիտանիայի վարչապետը, ինչպես և մյուս արևմտյան քաղաքական գործիչները, մտահոգված է նրանով, որ եթե Մոսկվան չաջակցի Սիրիայում հաշտություն հաստատելու Արևմուտքի ծրագրերին, ապա հակամարտությունը դուրս կգա վերահսկողությունից:
Կրեմլի անզիջում վերաբերմունքը սիրիական հարցում պայմանավորված է Սիրիայում ռազմա-ծովային բազայի առկայությամբ՝ հիշեցնում է թերթը: Բացի այդ, Մոսկվային անհանգստացնում է Արևմուտքի մտադրությունը:
«Պարանոյան դոմինանտ զգացում է, որը որոշում է Ռուսաստանի գործերն արտաքին աշխարհի հետ՝ սկսած Պետրոս Մեծի ժամանակներից»,- կարծում են հոդվածագիրները:
Հոդվածում նշվում է՝ Մոսկվան սկսում է գիտակցել, որ սիրիական ճգնաժամը կարող է լուրջ հետևանքներ ունենալ Ռուսաստանի տարածաշրջանային շահերի համար:
«Եթե Արևմուտքն ու Ռուսաստանը ի վիճակի են համագործակցել նման խնդրահարույց հարցի շուրջ, ինչպիսին Իրանի միջուկային ծրագիրն է, ապա ինչո՞ւ չեն կարող համատեղ աշխատել Սիրիայի հարցում»,- ասվում է հոդվածում:
