«Ազատ դեմոկրատներ» կուսակցության վարչության փոխնախագահ, քաղաքագետ Անուշ Սեդրակյանը «Առաջին լրատվական»-ի հետ զրույցում արտահայտելով իր կարծիքը ցինիկ և ինքնավստահ իշխանությանը համարժեք ընդդիմություն ստեղծելու մասին՝ ասաց. «Հանդգնությունն ու ցինիզմը հենց թուլության նշան են: Իշխանությունը վախենում է մտածող և տեղյակ քաղաքացուց»:
Անուշ Սեդրակյանի խոսքով՝ մենք գտնվում ենք ծուռ հայելիների թագավորությունում: «Ռուսական ինֆորմացիան զանգվածաբար հորդում է հայկական հեռուստաալիքներ և խեղվում»,- ասաց նա՝ հավելելով, որ բոլոր ընդդիմադիր ուժերը պետք է աշխատեն իրազեկ քաղաքացու վրա:
Մեր զրուցակիցը համարում է, որ ամեն ինչ արվում է, որպեսզի տեղեկացվածության ալիքը փոխարինվի բողոքի ալիքով, ինչի արդյունքում պետությունը կանգնում է փակուղու առջև:
Անդրադառնալով երեք հեղինակավոր կառույցների զեկույցներին, որոնք բոլորն էլ Հայաստանում արձանագրում են անկումներ, Անուշ Սեդրակյանն ասաց, որ բոլոր միջազգային կառույցները միմյանց մեսիջներ են ուղարկում առ այն, որ Հայաստանում չկա ժողովրդավարություն, այլ կա միայն դրա իմիտացիա. «Մենք ընկալվում ենք որպես ռուսական կայսրության շատ հլու-հնազանդ ծառա»:
Դիտարկմանը՝ ի վերջո Հայաստանում ձևավորված այս պատկերը, ընդդիմության չգոյությունը որքանո՞վ է կապված ԵՏՄ-ին Հայաստանի անդամակցության հետ, Անուշ Սեդրակյանը նկատեց. «Հայաստանը կորցրեց Արևելքում դեմոկրատիայի օրրան լինելու իր շանսը, որը ժամանակին ուներ:
Մի՞թե անընդհատ զինվորի միջոցով է պահվելու այս անորոշ բեռը, զինվորը անվերջ չի կարող կրել դիվանագիտության և պետության կառավարման ձախողումները: Ընդ որում՝ այդ բեռը բանակը չի կրում, այլ անձը»:
