Կոսովոյի սերբերը և սերբական աջակողմյան ընդդիմադիր կազմակերպությունները ուրբաթ օրը Բելգրադում «համասերբական հանրահավաք» կանցկացնեն, որի ժամանակ իրենց բողոքը կհայտնեն երկրի կառավարության՝ Կոսովոյի ալբանական իշխանությունների հետ հարաբերությունները կարգավորելու ծրագրի դեմ: Այս մասին հաղորդում է Ria Novosti-ն:
Միջոցառման կազմակերպիչներից մեկի՝ «Դռներ» շարժման հաղորդագրության համաձայն՝ ակցիայի նպատակն է միավորել երկրի քաղաքական ուժերը և թույլ չտալ Բելգրադի և Պրիշտինայի համաձայնագրի իրականացումը: Շարժումը կարծում է, որ այդ պայմանագիրը խախտում է Սահմանադրությունը և ողջունում Կոսովո պետության ինքնահռչակումը:
Բողոքի ակցիան տեղի կունենա Սերբիայի գլխավոր՝ Հանրապետական հրապարակում: Այն կսկսվի տեղի ժամանակով ուղիղ ժ. 12:44-ին: Դա խորհրդանշական ժամ է, որը պետք է հիշեցնի 1999թ. ՄԱԿ-ի Անվտանգության խորհրդի 1244 բանաձևը. այն հաստատում է Սերբիայի տարածքային ամբողջականությունը:
Սպասվում է, որ բողոքի ցույցին կաջակցի սերբական ուղղափառ եկեղեցին, իսկ հարթակից ելույթ կունենա Չեռնոգորիայի և Պրիմորիայի միտրոպոլիտ Ամֆիլոխին:
