Դեռ անցյալ շաբաթվա վերջին՝ ուրբաթ օրը, Երևանի Աբովյան և Պուշկին փողոցների հատման վայրում գրեթե 20 տարի գործող և զբոսաշրջիկների սիրելի վայր դարձած «Դոլմամա» ռեստորանի հիմնադիր-տնօրեն Ժիրայր Ավանյանը մեզ հետ զրույցում ասել էր, որ Երևանի քաղաքապետարանի թույլտվությամբ պատրաստվում են քանդել «Դոլմամա» ռեստորանը և հարակից 4 շինությունները:
Մինչդեռ Երևանի քաղաքապետարանի աշխատակազմի քաղաքաշինական գործունեության հատուկ ծրագրերի կարգավորման բաժնի պետ Արբակ Վարդանյանը Աբովյան-Պուշկին- Սախարով հրապարակի եռանկյունին քանդելու մասին լուրը հերքեց՝ պարզաբանելով, որ իրենց այդ շենքերին փոխարինող ոչ մի այլ նախագիծ սեփականատիրոջ կողմից չի ներկայացվել:
Այսօր Ժիրայր Ավանյանը հրապարակեց դեկտեմբերի 25-ին քաղաքապետարանից ուղարկված նամակը, որը փաստում էր լրիվ հակառակ իրականության մասին։
«Դոլմամայի» սեփականատերը վստահ է ՝ Երևանի պատմության այս մնացորդները քանդելու ծրագիրը վաղուց է պատրաստ, բայց նա խոստանում է ամեն գնով պայքարել ոչ միայն իր անձնական գործի, այլև այս փողոցի մյուս մասունքների պահպանման համար:
