Մի երկրում, որտեղ կան բիզնեսմեն նախարարներ և պատգամավորներ, անհնար է զերծ մնալ կոռուպցիոն ռիսկերից. ահազանգում են ԵՄ դեսպանները

Մի երկրում, որի թե՛ խորհրդարանում, թե՛ կառավարությունում կան մի շարք բիզնեսմեններ, անհնար է զերծ մնալ շահերի բախումից ու կոռուպցիոն ռիսկերից: Նման հայտարարությամբ հանդես եկավ ԵՄ պատվիրակության ղեկավար Պյոտր Սվիտալսկին «Ազգային և միջազգային ջանքերը կիրառական էթիկայի ոլորտում» թեմայով միջազգային խորհրդաժողովի ընթացքում, որը կազմակերպել էր Բարձրաստիճան պաշտոնատար անձանց էթիկայի հանձնաժողովը՝ Գերմանիայի տնտեսական համագործակցության և զարգացման դաշնային նախարարության և Գերմանական միջազգային համագործակցության կազմակերպության հայաստանյան գրասենյակի օժանդակությամբ:

Հանրային կառավարման օրենքը գերազանց օրենք է: Տարբեր կառույցներում էթիկայի հանձնաժողովի ստեղծումը ցույց է տալիս, որ Հայաստանն առաջ է ընթանում: Մենք ողջունում ենք այսպիսի մոտեցումը, սակայն հրավիրում ենք պաշտոնատար անձանց ուշադրությունը մեր մի քանի առաջարկների վրա: Մատչելի դարձնել գույքի հայտարարագրումը, հրապարակել հաշվետվություններ: Սա թույլ կտա խուսափել շահերի բախման երևույթից Հայաստանում, որտեղ մի շարք բիզնեսմեններ կան խորհրդարանում և կառավարությունում:

 Գերմանիայի Դաշնային Հանրապետության արտակարգ և լիազոր դեսպան Բերնհարդ Մաթիաս Քիսլերը ևս, շարունակելով ԵՄ դեսպանի դիտարկումները, կարևորեց Հայաստանում առկա կոռուպցիայի դեմ պայքարի արդյունավետությունը:

Կոռուպցիոն դրսևորումներ առկա են թե՛ պետական, թե՛ մասնավոր սեկտորներում: Ես լսում եմ քաղաքացիների անվստահության մասին կառավարման համակարգի և իշխանության նկատմամբ: Այս իրողությունը վերացնելու համար անհրաժեշտ է հզորացնել անկախ վերահսկող մարմինները, ես վստահ եմ, ո ր հաջորդ օմբուդսմենը կշարունակի Անդրեասյանի սկսած գործն ու իր ներդրումը կունենա այս գործընթացում: Քաղաքացիական հասարակությունը պետք է ավելի շատ ընդգրկված լինի անկախ վերահսկող մարմինների աշխատանքներում, և, վերջապես, քաղաքական գործիչները չպետք է զբաղվեն բիզնեսով, որպեսզի հնարավոր լինի խուսափել շահերի բախումից և կոռուպցիոն դրսևորումներից:

 Քիսլերը առանձնացրեց հատկապես կրթության և առողջապահության ոլորտները, որտեղ, ըստ դեսպանի, առկա են ամենատեսանելի, հետևաբար՝ ամենամեծ կոռուպցիոն ռիսկերը:

Ողջունելով դեսպանների դիտարկումներն ու, համենայն դեպս, չհակասելով դրանց՝ փոխվարչապետ Վաչե Գաբրիելյանը նշեց, որ Հայաստանում արվել են մի շարք աշխատանքներ՝ ուղղված վերը նշված խնդիրների վերացմանը, սակայն աշխատանքները դեռ ընթացիկ փուլում են:

 

Լուսանկարը՝  Photolure-ի