Հունական Լեսբոս, Կոս, Սամոս, Հռոդոս, Լերոս և Խիոս կղզիների ակտիվիստները կառաջադրվեն Խաղաղության Նոբելյան մրցանակի փախստականներին օգնելու համար։ Այս մասին հայտնում է The Guardian-ը։
Էգեյան ծովի կղզիների բնակիչներին առաջադրելու մասին առցանց միջնորդագիրն արդեն հավաքել է 280 հազար ստորագրություն։
Թուրքիայից ծովով Եվրոպա ժամանած 900 հազար մարդկանց մեծ մասին անմիջապես հունական կղզիների բնակիչներն են ընդունել, որոնցից շատերը թողել են աշխատանքը՝ ծովում մարդկանց փրկելու համար, բացել են նրանց առջև իրենց տան դռները և չնայած տնտեսական ճգնաժամին՝ կիսվել իրենց ունեցածով։
Կարեկցանքի ու ինքնանվիրման համար Օքսֆորդի, Փրինսթոնի, Հարվարդի, Քորնելի և Կոպենհագենի համալսարանների գիտնականներն առաջարկում են պարգևատրել հույներին Խաղաղության Նոբելյան մրցանակով և առաջադրման միջնորդություն պատրաստում։
Առաջադրման ժամկետը լրանում է փետրվարի 1-ին։ Գիտնականներն արդեն հանդիպում են անցկացրել միգրացիոն քաղաքականության հարցերով հույն նախարար Յոհանիս Մուզալասի հետ, ով վստահեցրել է նրանց Հունաստանի կառավարության կողմից աջակցության հարցում։
