Trtrussian.com կայքի փոխանցմամբ, Ավստրիա մեկնելուց առաջ Թուրքիայի նախագահ Աբդուլլահ Գյուլն անդրադարձել է ԵՄ-ին Թուրքիայի անդամակցությանը.
«Ապագայում Թուրքիան կդառնա բավական գրավիչ երկիր և մեծ ներդրում կունենա ԵՄ-ում: Սակայն հնարավոր է` Թուրքիայի ժողովուրդը «ոչ» ասի ԵՄ-ին անդամակցությանը, ինչպես որ արեց Նորվեգիայի ժողովուրդը: 2005 թվականին փոխադարձ համաձայնությամբ որոշվեց բանակցություններ վարել ԵՄ-ին Թուրքիայի անդամակցության շուրջ: Նրանք պետք է հավատարիմ մնան «pacta sunt servanda» (պայմանագրերը պետք է պահպանվեն) սկզբունքին:
ԵՄ-ը «ապօրինի ու անարդար» խոչընդոտներ է հարուցում Թուրքիայի անդամակցության ճանապարհին: Գլխավորն այն է, որ Թուրքիան «համապատասխանում» է ԵՄ-ի չափորոշիչներին: Չպետք է մարդկանց մեկուսացնել միայն նրա համար, որ նրանք այլ հավատ են դավանում»:
Հիշեցնենք, որ 1999 թվականի դեկտեմբերի 10-ին ԵԽ-ի` Հելսինկիում տեղի ունեցած գագաթնաժողովում Թուրքիային շնորհվեց ԵՄ-ին անդամակցելու թեկնածու երկրի կարգավիճակ:
2004 թվականի դեկտեմբերին Բրյուսելում անցկացված ԵԽ համաժողովում միաձայն որոշվեց Թուրքիայի հետ բանակցություններ սկսել 2005 թվականի հոկտեմբերի 3-ին: Այդ օրը ԵՄ անդամ երկրները Լյուքսեմբուրգում երկարատև քննարկումներից հետո ընդունեցին Թուրքիայի հետ բանակցություններ սկսելու որոշում: Այդ ժամանակ Թուրքիայի արտաքին գործերի նախարար (ներկայումս Թուրքիայի 11-րդ նախագահ) Աբդուլլահ Գյուլը հայտարարեց, որ Թուրքիան հասցրեց նստել մեկնող գնացքը։
