Ինդոնեզիայի խորհրդարանում դեսպան Աննա Աղաջանյանի և այդ երկրի Ժողովրդական խորհրդատվական ասամբլեայի նախագահ Զուլկիֆլի Հասանի հունվարի 21-ին կայացած հանդիպման ընթացքում քննարկվել են հայ-ինդոնեզական երկկողմ կապերը, այդ թվում` միջխորհրդարանական համագործակցությանն առնչվող հարցեր:
Ինչպես տեղեկացրին ՀՀ արտաքին գործերի նախարարության մամուլի, տեղեկատվության եւ հասարակայնության հետ կապի վարչությունից, Զուլկիֆլի Հասանը նշել է, որ Հայաստանի և Ինդոնեզիայի միջև առկա են սերտ հարաբերություններ, որոնք անհրաժեշտ է առավել ամրապնդել ոչ միայն կառավարությունների, այլև խորհրդարանների մակարդակներով:
Դեսպան Աղաջանյանն, իր հերթին, նշել է, որ Հայաստանը նույնպես կարևորում է Ինդոնեզիայի հետ հարաբերությունների ամրապնդումը՝ մեծ կարևորություն տալով նաև միջխորհրդարանական ձևաչափին: Այս համատեքստում դեսպանը զրուցակցին ներկայացրել է Հայաստանում վերջերս տեղի ունեցած սահմանադրական բարեփոխումների հանրաքվեի արդյունքում երկրի կառավարման ձևի փոփոխության վերաբերյալ տեղեկատվություն՝ նշելով, որ նոր սահմանադրությամբ խորհրդարանին առավել լայն լիազորություններ տրամադրելու պայմաններում, միջխորհրդարանական համագործակցությունը կարող է բացել երկկողմ հարաբերությունների ընդլայնման նոր հորիզոններ: