Ականավոր գիտնական Սթիվեն Հոքինգը միացել է, այսպես կոչված, ակադեմիական բոյկոտին՝ ընդդեմ Իսրայելի: Ինչպես հաղորդում է The Guardian բրիտանական թերթը, ֆիզիկոսը հրաժարվել է մասնակցել Իսրայելի նախագահ Շիմոն Պերեսի ղեկավարությամբ համաժողովին, որը պետք է տեղի ունենա Երուսաղեմում՝ հունիսին: Հոքինգը նման որոշում է կայացրել ի նշան բողոքի պաղեստինցիների հանդեպ Իսրայելի գործողությունների դեմ:
Ինչպես նշում է պարբերականը, համաժողովը կոչվում է «Դիմավորելով վաղը»: Ակնկալվում է, որ այն կհյուրընկալի շատ հայտնի մարդկանց: Միջոցառման շրջանակներում նախատեսվում է տոնել Պերեսի 90-ամյա հոբելյանը:
Հոքինգը հրաժարվել է մասնակցել համաժողովին դեռևս մեկ շաբաթ առաջ, սակայն պաշտոնապես չէր հայտարարել իր որոշման մասին: Գիտնականի հայտարարությունը իր համաձայնությամբ հրապարակել է Պաղեստինի համալսարանի բրիտանական կոմիտեն: Ֆիզիկոսի խոսքերով՝ նա որոշել է աջակցել բոյկոտին՝ հիմնվելով Պաղեստինի մասին իր գիտելիքների և այդ երկրից իր գիտնական գործընկերների միաձայն խորհրդի վրա:
Թերթը հիշեցնում է, որ ակադեմիական բոյկոտը հայտարարվել է ապրիլին: Առաջին եվրոպական կազմակերպությունը, որն աջակցել է բոյկոտին, Իռլանդիայի դասախոսների արհմիությունն է, իսկ ԱՄՆ-ում բոյկոտին աջակցել են Association for Asian American Studies-ի անդամները:
