Արարատի մարզի ոստիկանության նախկին աշխատակիցեր, իրենց կոլեգաների կողմից ծեծված, ընտանիքի երեք անդամներ` Ռազմիկ, Սրապիոն և Սամվել Արթենյանների պաշտպան Սեդա Սաֆարյանի դիմումին ՀՔԾ-ն պատշաճ ընթացք չի տվել:
Փաստաբանը պահանջում է քրեական պատասխանատվության ենթարկել Արարատի ոստիկանության մարզային վարչության նախկին պետ Մարգար Մելքոնյանին (նա տեղափոխվել է այլ մարզ) և ոստիկանության Վեդու բաժնի պետ Սևան Քոչարյանին: Նրանք հորն ու որդուն` Ռազմիկ և Սամվել Արթենյաններին, ապօրինաբար պահել էին ոստիկանությունում, այնուհետև Մարգար Մելքոնյանը Սամվելին հանել էր տվել վանդակաճաղերից և պահանջել, որ ծնկի գա և ներողություն խնդրի: Սամվելը հարցրել էր` ինչո՞ւ պետք է ներողություն խնդրեմ և չէր կատարել պահանջը, ինչից հետո Մելքոնյանը իրեն ենթակա ոստիկանների ներկայությամբ նվաստացրել և ծեծել էր Սամվելին: Փաստաբանի փոխանցմամբ, իր պաշտպանյալներն են այդպես նկարագրել: Ինչ վերաբերում է բաժնի պետ Սևան Քոչարյանին, ապա վերջինս Արթենյանների հարցին ի պատասխան` ասել է, որ նրանք իր պատիվն ու արժանապատվությունը գետնովն են տվել, որովհետև թույլ չեն տվել, որ ինքը Արթենյանների մեքենան դեպքի վայրից տանի տուգանային հրապարակ: Այ, հենց դրանից է պետ Քոչարյանը վիրավորվել ու նրանց գիշերը ապօրինաբար ոստիկանությունում պահել:
Հիշեցնենք, որ խոսքը 2011թ.-ի հունվարի 21-ին, ժամը 23.50-ի սահմաններում Արարատի մարզի լցակայաններից մեկում տեղի ունեցած միջադեպի մասին է. Արթենյանների ընտանիքի կրտսեր զավակը` 21-ամյա Սրապիոն Արթենյանը, երբ ինչ-որ խնջույքից դուրս է եկել և գնացել մարզի գազալցակայաններից մեկում ավտոմեքենան լիցքավորելու, այդ պահին «դեպքի վայրում» են հայտնվել Արարատի մարզի ոստիկանության երեք աշխատակիցներ` իբր դրանից մոտ մեկ ժամ առաջ ստացած ահազանգի հետքերով: Այնտեղ տեսել են Սրապիոն Արթենյանին և փորձել նրան տանել ոստիկանություն, և երբ, ամենայն հավանականությամբ, բանից անտեղյակ երիտասարդը փորձել է ընդդիմանալ, միանգամից դա ընդունել են որպես դիմադրություն իշխանության ներկայացուցչին: Այդ ժամանակ գազալցակայան են շտապել նաև Սրապիոնի հարազատները` հայրը, եղբայրը, հորեղբոր որդին:
Նրանք փորձել են պարզել քաշքշուկի պատճառը, բայց հետո այնպես է ստացվել, որ նրանք բոլորը միասին գնացել են Արարատի մարզի ոստիկանություն, որտեղ ապօրինաբար պահվել են անազատության մեջ, այնուհետև բռնության և ճնշումների ենթարկվել: Մեր ունեցած տեղեկություններով, ոստիկանության Վեդու բաժնի պետը Արթենյանների հանդեպ մինչ այդ` պետ նշանակվելուց հետո, ինչ-որ լարվածություն է ունեցել, և կասկած կա, որ կրտսեր Արթենյանի` Սրապիոնի տղայական ակտիվությունը պարզապես օգտագործել են Արթենյաններին պատժելու համար:
Գործը քննել է Հատուկ քննչական ծառայությունը և հայր ու որդիներ Արթենյաններին մեղադրանք առաջադրել ծառայողական պարտականությունները կատարող իշխանության ներկայացուցիչների առողջության համար վտանգավոր բռնություն գործադրելու` դիմադրություն ցույց տալու համար (քրօրի 316 հ. 2-րդ մաս): Հենց այս գործի շրջանակներում էլ ՀՔԾ-ն քննության առարկա էր դարձրել պաշտպան Սեդա Սաֆարյանի` Արթենյանների պետերին պաշտոնեական լիազորությունները չարաշահելու, անցնելու համար քրեական պատասխանատվության ենթարկելու մասին դիմումը, սակայն առանձին որոշմամբ մերժել էր նրանց որպես մեղադրյալ ներգրավել` հանցագործության մասին հաղորդումը ապացուցված չլինելու պատճառաբանությամբ: Սեդա Սաֆարյանը մեզ հետ զրույցում ասաց, որ այդ որոշումը բողոքարկելու են Կենտրոն և Նորք-Մարաշ վարչական շրջանների դատարանում, քանի որ նույնիսկ ցուցմունք տված վկա ոստիկաններից ոմանք են հայտնել, թե ինչպես է մարզային ոստիկանապետն իրենց ներկայությամբ ծեծել Սամվել Արթենյանին: Պաշտպանի տպավորությամբ, քննիչը չի ցանկացել հավատալ այդ ցուցմունքներին և չհավատալով էլ որպես մեղադրյալ չի ներգրավել պետերին:
Նախաքննության ընթացքում էլ, ըստ պաշտպանի, միակողմանի քննություն է ընթացել, ինչը քննություն կոչվելու իրավունք չունի: Ս.Սաֆարյանի խոսքով, այն ապացույցները, որոնք հետագայում ներկայացվել են իբր հավաստի ապացույցներ, քննություն կատարողի վերադասը կամ այլ ոչ իրազեկված պաշտոնյա երևի չգիտի, թե այդ ապացույցների ձեռքբերումն ինչպես է կատարվել, և այդ ապօրինություններն ինչ սահմանների են հասել: «Կարծում եմ, որ այս գործի ելքն էլ մնացած գործերի նման ծուռ է գնալու»,- դեռ նախաքննության փուլում կանխատեսել էր Սեդա Սաֆարյանը: Սակայն այժմ նա ամեն ինչ անում է, որ հավասարության սկզբունքը բոլորի համար գործի, շտկվեն քննության ընթացքը բացահայտորեն ծռած քննիչների սխալները և պետեր Մ.Մելքոնյանն ու Ս.Քոչարյանը ևս քրեական պատասխանատվության ենթարկվեն:
Իսկ Արթենյանների մասով գործն արդեն մտել է Արարատի և Վայոց ձորի մարզերի ընդհանուր իրավասության դատարան, նախապատրաստական փուլում է և այն լսելու է դատարանի նախագահ Գագիկ Սարգսյանը:
