ԱՄՆ-ը և Հարավային Կորեան չեն հանդուրժի ԿԺԴՀ-ի սպառնալիքներն ու սադրանքները: Այս մասին հայտարարել է «Ռենհալ» գործակալությունը՝ հղում անելով Կորեայի Հանրապետության նախագահին:
Կորեայի Հանրապետության նախագահ Պակ Կին Հեն նման հայտարարություն է արել ԱՄՆ նախագահ Բարաք Օբամայի հետ հանդիպումից հետո: Նիստը տեղի է ունեցել ԿԺԴՀ-ի կողմից ռազմական հռետորիկան մեղմացնելու ֆոնին:
Հարավային Կորեայի նախագահը նշել է, որ «ԿԺԴՀ-ն չի կարողանա գոյատևել, եթե կառչի միայն միջուկային զենքի վրա՝ ի դժբախտություն իր ժողովրդի: Միջուկային հզորությունների և տնտեսության զուգահեռ զարգացումը չեն կարող երկիրը տանել հաջողության»: Նա ԿԺԴՀ-ի առաջնորդին կոչ է արել «ճիշտ ընտրություն կատարել», որը ներառում է նաև «վստահության գործընթացի սկսելը»:
Օբաման ընդգծել է, որ ԱՄՆ-ը և Հարավային Կորեան «միասնական են, ինչպես երբևէ», իսկ Հյուսիսային Կորեան «մեկուսացած է, ինչպես երբևէ»: «Եթե Փխենյանը ենթադրում էր, որ նրա սպառնալիքները ճեղք կբացեն Հարավային Կորեայի և ԱՄՆ-ի միջև կամ որևէ կերպ միջազգային ճանաչում կստանան, ապա այսօրվա իրադարձությունը ապացույցն է այն բանի, որ Հյուսիսային Կորեան կրկին պարտվել է»,- ասել է ԱՄՆ նախագահը:
Օբաման նաև հայտարարել է, որ ԱՄՆ-ը ԿԺԴՀ-ից սպասում է, որ երկիրը կշարժվի ապամիջուկայանացման խաղաղ ճանապարհով՝ հետևելով միջազգային պարտականություններին և միանալով միջազգային հանրությանը՝ հանուն «հյուսիսկորեական ժողովրդի անկախության և բարգավաճման»:
