Երևանի ավագանու ընտրություններում գրանցված ընտրախախտումներից մեկի փաստով քրեական գործ է հարուցվել: Երեկ ժամը 13:30-ին ՀՀ ոստիկանության Մալաթիայի բաժնի ԱԳԲ-ի տեսուչից ոստիկանության բաժին ահազանգ էր ստացվել այն մասին, որ 8/23 ընտրատեղամասում հանձնաժողովի նախագահն արձանագրել է միջադեպ, թե ՀԱԿ-ի ներկայացուցիչ Դավիթ Մ.-ի մոտից երեք հատ քվեարկած քվեաթերթիկ է հայտնաբերվել: Մալաթիայի քննչական բաժնում ՀՀ քրեական օրենսգրքի 34-153-րդ հոդվածի 1-ին մասի հատկանիշներով հարուցվել է քրեական գործ:
Ինչպես «Առաջին լրատվական»-ի հետ զրույցում տեղեկացրեցին ՀՀ ոստիկանության հասարակայնության հետ կապի և լրատվության բաժնից, Դավիթ Մխիթարյանի նկատմամբ խափանման միջոց է ընտրվել ստորագրությամբ քաղաքից չբացակայելը: Ըստ ՀՀ ոստիկանության՝ վերջինս հարցաքննվել է՝ որպես կասկածյալ, իսկ որպես վկաներ հարցաքննվել են հանձնաժողովի անդամները: Կատարվել է նաև առերեսում հանձնաժողովի անդամի և կասկածյալի միջև: Քննությունը շարունակվում է:
Լուսանկարը` PanARMENIAN Photo-ի
