Ռուսական RIA Novosti լրատվական գործակալությանը տված հարցազրույցի ժամանակ Իրանի զբոսաշրջության ու մշակութային ժառանգության կազմակերպության ղեկավարի տեղակալ Մութրազա Ռահմանի Մովահեդը հայտարարել է, որ Իրանն աջակցում է ռուսաստանցի զբոսաշրջիկների համար վիզային ռեժիմի չեղյալ հայտարարումը։
Մովահեդն ընդգծել է, որ Իրանը չի բացառում, որ այդ քայլին կարող է գնալ միակողմանի կարգով. «Մենք վստահ ենք, որ եթե ցանկանում ենք զարգացնել մեր զբոսաշրջությունը, ապա պարտավոր ենք հեշտացնել վիզայի ստացման գործընթացը։ Մենք տվյալ ուղղությամբ արդեն գործել ենք երկու քայլ։ Նախևառաջ 15 օրից մինչև 30 օր ենք դարձրել վիզայի գործողության ժամկետը, որը զբոսաշրջիկը ստանում է օդանավակայանում։ Երկրորդ քայլն այն է, որ մենք արդեն իսկ գտնվում ենք էլեկտրոնային վիզաներ մշակելու գործընթացում, և հնարավոր է, որ դա տեղի ունենա արդեն մեկ տարի անց»։
Խոսելով Եվրոպայից ժամանող զբոսաշրջիկների մասին՝ Մովահեդը հայտարարել է, որ 2014 թվականին Իրան այցելել է 5 միլիոն եվրոպացի զբոսաշրջիկ, իսկ 2015 թվականին նրանց թիվն աճել է 8 տոոկսով։ Մովահեդը կանխատեսել է, որ այս տարի միջազգային պատժամիջոցների վերացումից հետո այդ ցուցանիշն էլ ավելի կաճի։
Նա ընդգծել է, որ իրենք ցանկանում են, որ 2020 թվականին Իրան ժամանի 20 միլիոն զբոսաշրջիկ։ Նա մանրամասնել է, որ նկատի ունի ոչ թե միայն եվրոպացի զբոսաշրջիկներին, այլ՝ բոլորին։
