Զինված անձինք, որոնք շուրջ մեկ շաբաթ շրջափակել էին Լիբիայի մայրաքաղաք Տրիպոլիում գտնվող ԱԳՆ և ՆԳՆ շենքերը, երկուշաբթի կրկին գրավել են կառավարական հաստատությունները: Այս մասին հաղորդում է Agence France-Presse-ը՝ վկայակոչելով ցուցարարների առաջնորդներից մեկին:
«Մենք մտադիր ենք մեր գործողությունները շարունակել այնքան ժամանակ, քանի դեռ Ալի Զեյդանը (Լիբիայի վարչապետ 1-in.am) հրաժարական չի տվել»,- ասել է նա:
Հիշեցնենք, որ ապրիլի 28-ից սկսած՝ մի քանի հարյուր զինված մարդիկ շրջափակման մեջ են պահել Լիբիայի ԱԳՆ և ՆԳՆ շենքերը: Նրանք իշխանությունից պահանջում են հեռացնել երկրի նախկին առաջնորդ Մուամար Քադաֆիի կողմնակիցներին և աշխատանքով ապահովել այն զինծառայողներին, որոնք մասնակցել են Քադաֆիի վարչակարգի տապալմանը:
Կիրակի լույս երկուշաբթի գիշերը լիբիական ԶԼՄ-ները հաղորդում են, որ ցուցարարները դադարեցրել են նախարարությունների շենքի շրջափակումն այն բանից հետո, երբ իշխանություններն օրենք են ընդունել, համաձայն որի՝ սահմանափակվում են քաղաքական կյանքին մասնակցելու նախկին վարչակարգի կողմնակիցների իրավունքները, և խոստացել են բավարարել նրանց մյուս պահանջները:
