Google ինտերնետ հսկան պատրաստվում է մոտ ժամանակներս YouTube-ի համար պրոֆեսիոնալ տեսանյութերի մատակարարներին տալ իրենց ալիքների հասանելիության համար գումար վաստակելու հնարավորություն: Այս մասին հայտնում է The Financial Times-ը՝ հղում անելով իրադրությանը ծանոթ աղբյուրներին:
Վճարովի բաժանորդագրության համակարգի մշակման մասին շշուկները շուկայում պտտվում են արդեն մի քանի ամիս: Ոչ միայն գովազդից, այլև բաժանորդագրությունից գումար վաստակելու հնարավորությունը կմեծացնի YouTube-ում որակյալ տեսանյութերի ծավալը: Դա կարող է նպաստել ժամանակի մեծացմանը, որն օգտատերերը միջինն անցկացնում են կայքում: Բացի այդ, նորարարությունը կարող է եկամտի նոր աղբյուր ստեղծել վիդեոհոսթինգի համար:
Պարբերականի տվյալներով՝ գործառույթը կարող է ներկայացվել արդեն այս շաբաթ: Սկզբում վճար կսահմանվի 50 ալիքների վրա, որոնցից յուրաքանչյուրի ամսական բաժանորդագրությունը կարժենա 2 դոլար:
Google-ի ներկայացուցիչները նախագծի վերաբերյալ այլ մանրամասներ չեն ներկայացրել, չեն հստակեցրել նաև դրա գործարկման ժամանակային սահմանները:
RBC Capital Markets-ի վերլուծաբան Մարկ Մահեյնիի գնահատականով՝ 2012-ին YouTube-ի եկամուտն աճել է 60 տոկոսով՝ հասնելով 4 միլիարդ դոլարի, չնայած դրա մոտ կեսը վիդեոհոսթինգը տալիս է հեղինակներին:
