ԱՄՆ Հանրապետական կուսակցությունը քննադատել է երկրի նախագահ Բարաք Օբամայի՝ Կոնգրեսին ուղղված «Երկրի դրության մասին» ուղերձը: TASS-ի հաղորդմամբ՝ պաշտոնական պատասխանով ելույթ է ունեցել Հարավային Կառոլինայի նահանգապետ Նիկկի Հեյլին:
Հեյլիի խոսքով՝ ԱՄՆ վարչակազմի ղեկավարին ամենից լավ հաջողվում է գեղեցիկ խոսել: «Ցավոք, Օբամայի ձեռքբերումները հաճախ չեն համապատասխանել նրա վերամբարձ խոսքերին»,- նշել է քաղաքական գործիչը:
«Ավելի վատ է, որ մենք բախվում ենք սեպտեմբերի 11-ից ի վեր ամենալուրջ սպառնալիքին ահաբեկչության կողմից, և այս նախագահը, ըստ ամենայնի, չի ուզում կամ չի կարողանում հաղթահարել այն»,- հավելել է Հեյլին: Նախագահը հակված է չարաշահել վերամբարձ արտահայտությունները, կարծում է Հեյլին:
Ուղերձում, մասնավորապես, Օբաման խոսել է երկրի աճող հզորության մասին և խնդրել է արտոնել ԱՄՆ զորքերի օգտագործումը ԴԱԻՇ-ի դեմ:
«Ոչ մի երկիր չի համարձակվի հարձակվել մեզ կամ մեր դաշնակիցների վրա, քանի որ նրանք գիտեն, որ դա ճանապարհ է դեպի մահ: Հետազոտությունները ցույց են տալիս, որ մեր դիրքերն ամբողջ աշխարհում ավելի ուժեղ են, քան այն ժամանակ, երբ ես ընտրվեցի այս պաշտոնում»,- ասել է Օբաման:
Ըստ ԱՄՆ նախագահի՝ ժամանակակից աշխարհում Ամերիկայի համար հիմնական վտանգը ներկայացնում են ոչ այնքան «չարիքի կայսրությունները», որքան անապահով պետությունները:
