ԵԽԽՎ հունվարյան նստաշրջանում քննարկվելու են երկու հակահայ բանաձևեր: ԱԺ պատգամավոր Էդմոն Մարուքյանի հավաստմամբ՝ ԵԽԽՎ-ում հայկական պատվիրակությունը ակտիվորեն աշխատում է, որ հակահայկական երկու բանաձևերը չընդունվեն: «Բացի պատվիրակությունից՝ աշխատանքներ են տանում նաև հայկական դեսպանությունները, սփյուռքում գործող հայկական կազմակերպությունները, և այս պահին որևէ բան կանխատեսել, կարծում եմ՝ շատ բարդ է: Հույս ունեմ, որ այդ բանաձևերը չեն ընդունվի: Օրակարգից հանելու հնարավորություն երևի թե չի լինի, բայց հնարավոր կլինի ուղղակի մերժել այդ բանաձևերը,- «Առաջին լրատվական»- ի հետ զրույցում նշեց Էդմոն Մարուքյանը:
ԱԺ պատգամավորի խոսքով՝ ԵՏՄ անդամակցությունից հետո շատ բարդ է նշված կառույցներում մեր պատվիրակությունների աշխատանքը, որովհետև եվրոպական մեր շատ գործընկերներ հիասթափված են, բայց մյուս կողմից շատ կարևոր է, որ մենք կարողանանք Ադրբեջանի դեմ օգտագործել այն խաղաթղթերը, որոնք ունենք՝ կապված ներքին իրավիճակների, մարդու իրավունքների ոտնահարման, քաղբանտարկյալների, լրագրողների նկատմամբ ճնշումների հետ: «Տարածաշրջանային զարգացումների համատեքստում պետք է փաստարկել, որ եթե չլինի ժողովրդավարական տարածաշրջան, մենք չենք կարող որևէ խնդիր լուծել»,- նշեց Է. Մարուքյանը:
Անդրադառնալով քաղաքացիական ակտիվիստ Գևորգ Սաֆարյանի ձերբակալմանը՝ Է. Մարուքյանը նշեց. «Նրա նկատմամբ որպես խափանման միջոց արդեն մեկ անգամ՝ մեկ այլ գործով ընտրվել է կալանքը : Սա նշանակում է, որ եթե որևէ կերպ նախորդ անգամ նա չի խոչընդոտել նախորդ նախաքննությունը, կարող էր այս նախաքննությունը ևս չխոչընդոտել: Կալանքը որպես խափանման միջոց պետք է կիրառվի բացառիկ դեպքերում, եթե կան փաստարկներ, հիմնավոր կասկած, որ նա կարող է խոչընդոտել նախաքննությունը: Այս դեպքում աբսուրդ է ասել, որ նա կարող էր ազդել նախաքննության վրա: Նրա նկատմամբ խափանման միջոցը պետք է փոխել»:
Մանրամասները՝ տեսանյութում:
