Մեծ Բրիտանիայի ոստիկանությունը տղամարդու բռնաբարելու կասկածանքով ձերբակալել է բրիտանական խորհրդարանի Համայնքների պալատի փոխխոսնակ Նայջել Էվանսին։ Այս մասին հայտնում է The Telegraph-ը:
Պահպանողական կուսակցությունից Համայնքների պալատի պատգամավոր 55-ամյա Էվանսը կասկածվում է 2009-ի հուլիսից 2013-ի մարտն ընկած ժամանակահատվածում 20-30 տարեկան մի տղամարդու բռնաբարության մեջ, ևս մեկի նկատմամբ սեռական ոտնձգություններ կատարելու մեջ:
Պարբերականի տվյալներով՝ խորհրդարանականը ձերբակալվել է շաբաթ օրը՝ Լանկաշիր կոմսության Փենդլթոն քաղաքի իր տանը: Ձերբակալությունից հետո նրա տանը խուզարկություն է կատարվել: Ոստիկանական բաժանմունքում հարցաքննությունից հետո Էվանսին գրավի դիմաց մինչև հունիսի 19-ն ազատ են արձակել:
Ձերբակալման փաստի մասին ոստիկանությունը ծանուցել է Համայնքների պալատի խոսնակ Ջոն Բերքոուին և վարչապետ Դևիդ Քեմերոնին:
Նշենք, որ Էվանսը 2010 թվականին հրապարակավ խոստովանել է իր նույնասեռական լինելը:
