«Երկարատեւ քրեական պատմություն ունեցող մարդիկ մահացու զենք գնելու ազատ հնարարավորություն ունեն, չափից մեծ ազատ», – «Ամերիկայի Ձայն»–ի փոխանցմամբ՝ հայտարարել է ԱՄՆ-ի նախագահ Բարաք Օբաման:
Միացյալ Նահանգների նախագահը որոշել է լրջորեն զբաղվել զենքի վաճառքը խստացնելու հարցով, քանի որ, նախագահի խոսքով, խնդրի լրջությունն արդեն կենսական նշանակություն ունի երկրի համար:
«Յուրաքանչյուր տարի ավելի քան 30,000 ամերիկացի զոհվում է զենքերից, հարյուր հազարավոր մարդիկ կորցնում են իրենց եղբայրներին եւ քույրերին, ծնողները՝ հողին հանձնում իրենց զավակներին», – նշել է Օբաման:
Նախագահ Օբամայի խոսքով՝ Միացյալ Նահանգները միակ առաջատար երկիրն է, որտեղ այս ծավալներով է տարածված զենքի կիրառմամբ զանգվածային բռնությունը:
«Մեզ համար այն նույնիսկ սովորական է դարձել, եւ խնդիրը կարգավորելու փոխարեն մենք ընկղմված ենք դրա շուրջ վեճերի մեջ», – ավելացրել է նախագահը:
Հրազենային զանգվածային հարձակումների օրինակների թվում Բարաք Օբաման թվարկեց Նյութաունի դպրոցում 2012-ին տեղի ունեցած ողբերգությունը, որի ընթացքում հոգեկան խանգարումներ ունեցող 20-ամյա, զինված հանցագործը սպանել էր սեփական մորը, դպրոցի 6 ուսուցչի եւ առաջին դասարանի 2Օ աշակերտների: Հիշատակելով սպանված 6 տարեկան երեխաներին՝ նույնիսկ աշխարհի ամենահզոր երկրի առաջնորդը չկարողացավ զսպել արցունքները:
«Ամեն անգամ, երբ այդ երեխաների մասին եմ մտածում … այդ միտքն ինձ խելագարեցնում է: Ու ի դեպ, նման դեպքեր պատահում են Չիկագոյի փողոցներում, ամեն օր», – նշեց Օբաման:
Միացյալ Նահանգների նախագահն առաջարկել է կարգավորել զենք գնելու գործընթացը, մասնավորապես, լիցենզավորել զենքի վաճառքով զբաղվող բոլոր ընկերություններին եւ ձեռներեցներին, եւ կարգավորել զենք գնելու թույլտվություն ձեռք բերելու գործընթացը: Այժմ, Օբամայի խոսքով, ինտերնետով կարելի է զենք գնել առանց որեւէ թույլտվության:
Ամբողջությամբ՝ սկզբնաղբյուր կայքում
