Եվրահանձնաժողովը մանրամասն ուսումնասիրում է պետական օգնության համապատասխանությունը օրենսդրությանը, որը պետք է տրամադրվի ֆինանսական դժվարություններ կրող PSA Peugeot-Citroen ընկերությանը՝ հաղորդում է Deutsche Welle-ն:
Ֆրանսիական կառավարությունը անցած տարվա հոկտեմբերին ավտոկոնցեռնին խոստացել է 7 մլրդ եվրոյի գումարի վարկային երաշխիքներ:
Ընթացիկ տարվա փետրվարին Եվրահանձնաժողովը արդեն հավանության էր արժանացրել կոնցեռնին 1.2 մլրդ եվրոյի պետական օգնություն տրամադրելու ծրագիրը:
Սուբսիդիայի տրամադրման գլխավոր պայմանը ավտոարտադրողի մշակած պլանն է սեփական վերակառուցման մասին: Peugeot-Citroen-ը միայն վերջերս է կատարել այդ պահանջը:
Խնայողության նպատակով կոնցեռնը պարտավորվում է կրճատել անձնակազմը ու համագործակցել գերմանական Opel ավտոընկերության հետ:
