Երգչուհի Էմմին թեև նոր է վերադարձել մի շարք պրոմոշրջագայություններից` Ամստերդամ, Մոսկվա,Կիև, Աթենք, Ռիգա, որտեղ ջերմ ընդունելության է արժանացել, բայց դեռ կհասցնի լինել նաև Ֆրանկֆուրտում, Բեռլինում:
Նրա խոսքերով, ջերմ ընդունելության է արժանացել ամենուր, Եվրոպայում լսում են իր երգը, ռադիոյով այն պատվիրում, քանի որ, ըստ նրա, «Բում-բում» երգը դրական երգ է, երբ երեք րոպեների ընթացքում լսում ես այն ու սկսում բում-բում, չակա-չակա երգել: «Եվրատեսիլ-2011»-ի կազմակերպիչները խոստանում են «ուժեղ» շոու:
Աթենքից Հայաստան հրավիրված բեմադրիչ Արմինե Զարյանը շատ ուրախ է, որ այս տարի ներկայացնում է Հայաստանը, քանի որ իրեն հնարավորություն կտրվի ցույց տալ հայերի եռանդը, ինչը «Եվրատեսիլից» ամեն տարի պակասում էր:
Իսկ հարցին` բեմում մենք ինչո՞վ կառանձնանանք մյուսներից, Արմինե Զարյանը պատասխանել է. «Կլինեն չորս տղամարդ, որոնք իրենց էներգիայով, հայկական գույներով, եռանդով, ժպիտով հանդես կգան, կկրեն դասական և սպորտային թեթև հագուստներ»: Իսկ թե որո՞նք են հայկական գույները, այդպես էլ թաքցրին:
Այս տարի հագուստի հարցում դիմել են հայ դիզայներների, ովքեր, ինչպես նշում է Էմմին, չեն զիջում արտերկրի դիզայներներին: