Հյուսիսային Կորեան պետք է անհապաղ ազատ արձակի կորեական ծագում ունեցող ԱՄՆ քաղաքացի Քենետ Բեյին, որը դատապարտվել է 15 տարվա հարկադիր աշխատանքի: Ինչպես հաղորդում է ITAR-TASS-ը, նման հայտարարությամբ հանդես է եկել ԱՄՆ Պետդեպարտամենտի պաշտոնական ներկայացուցիչ Պատրիկ Վենտրելը:
«Որքան մենք գիտենք, Բեյը ձերբակալվել է թշնամական գործողությունների համար: Մենք Հյուսիսային Կորեայի իշխանություններից պահանջում ենք համաներում շնորհել նրան և անհապաղ ազատ արձակել»,- նշել է նա:
Պետդեպի ներկայացուցիչն ասել է, որ Փխենյանում ԱՄՆ-ի շահերը ներկայացնող շվեդ դիվանագետները Բեյին այցելել են ապրիլի 26-ին, սակայն Վենտրելը չի պատասխանել այն հարցին, թե ինչպես է ԱՄՆ քաղաքացու առողջական վիճակը:
Վենտրելը նաև նշել է, որ ԱՄՆ-ը կասկածում է Հյուսիսային Կորեայի դատարանի թափանցիկությանը:
Բեյը «ժողովրդական հանրապետության հանդեպ թշնամական գործողությունների» մեղադրանքով ձերբակալվել է 2012թ. նոյեմբերի 3-ին՝ Հյուսիսային Կորեայի Ռասոն քաղաքում, որտեղ ժամանել էր զբոսաշրջային մուտքի այցագրով: Ապրիլի 30-ին դատարանը նրան դատապարտել է 15 տարվա հարկադիր աշխատանքի:
