Լոռու մարզի Լեռնապատ գյուղի այս տնակում է բնակվում Մարինեն իր հինգ անչափահաս երեխաների հետ։ Ամուսինն արդեն մի քանի տարի է՝ ընտանիքը թողել-գնացել է խոպան։ Գյուղացիների խոսքով՝ այնտեղ նոր ընտանիք է կազմել և վերադառնալու միտք էլ չունի։
Մեր այցելության պահին Մարինեն գնացել էր մարզպետարան՝ օգնություն խնդրելու: Տանն էին երեք անչափահաս որդիները և դուստրերից մեկը։
Չնայած սոցիալական ծայրաստիճան վատ պայմաններին՝ երեխաները սրտատրոփ սպասում էին Ամանորին, նույնիսկ տունն էին զարդարել։
Ամանորին սպասում են նաև, որպեսզի ամենօրյա վառարանում պատրաստված կարտոֆիլի փոխարեն տոլմա ուտեն։
Երեխաները երազում են նաև համակարգիչ ունենալու մասին, ավագ որդին էլ, թեպետ ընդամենը 11 տարեկան է, տեղյակ է սահմանային լարված իրավիճակից , ուզում է, որ եկող տարի մեր երկիրը խաղաղ լինի: Ինքն էլ նպատակ ունի հնարավորության դեպքում ուսանել Մոնթե Մելքոնյանի անվան վարժարանում։ Անունն էլ հենց Մոնթե է։
