Արագածոտնի մարզի Թալին քաղաքում տարեմուտը դիմավորում են դրական ակնկալիքներով, սակայն շատերը պարտքով են սեղան գցելու: Թալինի խանութպաններից մեկն ասում է, որ 60-70 տոկոսը պարտքով են առևտուր անում:
Թալին քաղաքում առաջինը աչքի են զարնում թալինցիների գեղեցիկ ու մեծ տները, որոնցից որոշների դարպասներին, սակայն, կողպեքներ կան. Նշանակում է՝ դրանց տերերը Թալինում չեն ապրում այլևս: Ակնառու է նաև քաղաքի փողոցների անմխիթար ու տեղ-տեղ քարուքանդ վիճակը:
Թալինում ապրող 60-ամյա Մարիետա Մելքոնյանը միայնակ այրի է: Թոնրատանը հաց է թխում, ինչպես ինքն է ասում, և՛ իր, և՛ թալինցիների համար: Ասում է՝ թալինցին ստեղծող է, բայց պետք է նրան ձեռք մեկնել:
Չնայած իրենց հոգսերին ու խնդիրներին՝ Թալին քաղաքում Նոր տարուց ամենաշատը խաղաղություն են սպասում: Թալինի 47-ամյա բնակիչ Աննա Բարեյանի որդին՝ Վահե Ավետիսյանը, 1.5 տարի ծառայում է «Եղնիկներ» կոչվող սահմանային զորամասում: Եկող տարվա համար Վահեի մայրը խաղաղություն է երազում, որ բոլոր զինվորներն անփորձանք վերադառնան տուն:
Թալին քաղաքում ապրող 3-ամյա Նազարեթը երազում է մեծանալ, որ զինվոր դառնա: Նազարեթի տատը՝ Ագապի Սարգսյանը, 38 տարի ապրում է Թալինում, արմատներով սասունցի է, ընտանիքի միակ եկամուտը անասնապահությունն է: Նոր տարվա սեղանին սեփական տան բարիքներն են դնելու ընտանիքին և հունվարի 13-ին պատրաստելու են Սասնա ավանդական կոպեկով գաթան:
Ագապի Սարգսյանն ասում է, որ թալինցիներ կան, որ Նոր տարի էլ չեն անում: Ռուսաստանից տղամարդիկ այս տարի անփող են եկել: Իր ամուսինն էլ այս տարի Ռուսաստանից առանց եկամտի է վերադարձել:
Մանրամասները դիտեք տեսանյութում:
