Ոչ ալկոհոլային ըմպելիքների PepsiCo արտադրողը YouTube-ից հեռացրել է Mountain Dew գազավորված ըմպելիքի գովազդը՝ ռասիզմի ու կանանց նկատմամբ բռնության խնդիրները անտեսելու մեղադրանքի պատճառով: Այս մասին հաղորդում է Associated Press-ը:
Տեսանյութում պատկերված է ոստիկանական բաժանմունք, որտեղ իրավապահները ծեծի ու կապտուկի հետքերով կնոջը խնդրում են ճանաչել 6 անձանցից (5 աֆրոամերիկացի ու Ֆելիցիա անունով այծ) իրեն վիրավորողին:
Այծը ճանաչման ժամանակ սպառնում է կնոջը «բերանը փակ պահել», ինչից հանդիսատեսը հասկանում է, որ հենց այծն է հասցրել վնասվածքները:
Ամբողջ ժամանակ ոստիկանն իր ձեռքին է պահում Mountain Dew-ի շիշը ու պարբերաբար խմում է դրանից:
59-վայրկյանանոց տեսահոլովակը քննադատության է ենթարկվել YouTube-ում:
PepsiCo-ն ներողություն է խնդրել ու խոստովանել է, որ գովազդն իրականում կարող է վիրավորական լինել:
Ընկերությունը ընդգծել է, որ հոլովակը նախատեսված է եղել համացանցի համար ու երբեք չի ցուցադրվել հեռուստատեսությամբ:
