Ամենաառաջին բարև տվողը եղել է Արծվիկ Մինասյանը։ Այսօր լրագրողների հետ հանդիպման ժամանակ այս մասին ասաց ՀՅԴ ԳՄ ներկայացուցիչ, Երևանի ավագանու ընտրությունների ՀՅԴ ցուցակը գլխավորող Արմեն Ռուստամյանը: Նա նշեց, որ Րաֆֆի Հովհաննիսյանի ղեկավարած շարժումը կարծես կապվում էր ապրիլի 9-ի հետ, իսկ ՀՅԴ-ի խնդիրն այն «երկու ուղղությամբ թափ տալն» էր՝ մղել իշխանություններին զիջումների և երկու տարվա ընթացքում անցում կատարել խորհրդարանական համակարգի՝ նոր ընտրակարգով:
«Ընդդիմությանը պետք է այդ ընթացքում տրվեին լծակներ՝ իշխանությանը վերահսկելու համար։ Եվ նաև ասացինք, որ կարևորագույն հանգրվան է Երևանը։ Դա պետք է դիտվի պայքարի կարևորագույն մաս: Համաձայն էինք, որ գլխավորի (Րաֆֆի Հովհաննիսյանը-1in.am) ավագանու ցուցակը և ընդգրկվենք ցուցակով և այդ կերպ միասնական ցուցակ ձևավորվի, սակայն ասացին, թե ընտրված նախագահը չի կարող նսեմացնել իր դերը»,- հիշեց Արմեն Ռուստամյանը:
Խոսելով Րաֆֆի Հովհաննիսյանի «բարևից»՝ նա ասաց, որ բարևը հո Րաֆֆո՞ւնը չէ, Աստծունն է: «Եթե այդպես ասենք, ամենաառաջին բարև տվողը եղել է Արծվիկ Մինասյանը, ման էր գալիս, բարև էր տալիս»,- նկատեց նա:
