Համաշխարհային բանկի (ՀԲ) և Արժույթի միջազգային հիմնադրամի (ԱՄՀ) քաղաքականությունը իրավիճակային գնահատման քաղաքականություն է: Նման հայտարարություն արեց ԱԺ ՀՅԴ-ական պատգամավոր, տնտեսագետ Արծվիկ Մինասյանը, պատասխանելով այն հարցին, թե ինչպես է ստացվում, որ ԱՄՀ-ն հաճախ էականորեն փոխում է իր կանխատեսումները:
Հիշեցնենք, որ ընդամենը մի քանի շաբաթ առաջ ԱՄՀ Հայաստանի գրասենյակի մշտական ներկայացուցիչ Գիերմո Տոլոսան հայտարարել էր, թե այս տարվա վերջում և եկող տարվա սկզբին «գնաճը կվերադառնա ԿԲ սահմանած թիրախային միջակայք» (http://1in.am/arm/armenia_economy_16459.html):
Սակայն երեկ ԱՄՀ-ն հրապարակել էր «Մերձավոր Արևելքի և Կենտրոնական Ասիայի տարածաշրջանային տնտեսության զարգացման հեռանկարներ» հերթական զեկույցը, որտեղ կանխատեսված էր գնաճի 9.3% ցուցանիշ:
«ԱՄՀ-ն վերցնում և նայում է` տնտեսության մեջ ինչ ֆինանսական ռեսուրսներ են մուտք եղել, ինչպիսի հարկաբյուջետային քաղաքականություն է վարվում այդ պահին, և դրանից ելնելով` տալիս է գնահատական: ԱՄՀ-ն երբեք չի կարող 100% ճիշտ լինել, որովհետև ինքը գնահատում է միայն այս պահի դրությամբ եղած պարամետրերով: Ես ընդհանրապես խորհուրդ չեմ տա նույն ԱՄՀ-ին և ՀԲ-ին քթները շատ խոթել մեր տնտեսության մեջ: Իսկ մերոնց խորհուրդ կտայի մի քիչ ավելի տղամարդկային կեցվածք որդեգրել, ոչ թե՝ ԱՄՀ-ն փռշտում է ու ասում` մենք չենք սիրում հարկային արձակուրդները, միանգամից բոլորը փոխում են իրենց որոշումը: Նախագահը ասել է, պետք է տեր լինեն այդ որոշմանը` հարկային արտոնություններին տարածքային մասնագիտացման սկզբունքով»,- ասաց Ա. Մինասյանը: