Հայաստանի համար ոչ մի ավելի ծանր խնդիր չկա, քան արտագաղթը: Այսօր լրագրողների հետ հանդիպմանը այս մասին ասաց ԱԺ ՀԱԿ խմբակցության քարտուղար Արամ Մանուկյանը:
«Այն, ինչ մի քանի օր առաջ տեսա, այն մարդկաց քանակը, որ կար Վրաստանի սահմանի վրա, սահմռկեցուցիչ էր. հետո իմացա, որ նույն տեսարանին է ականատես եղել նաև Հրանտ Բագրատյանը: Պատկերացրեք, սա՝ միայն Վրաստանի սահմանի վրա, նույնքան մարդ էլ արտագաղթում է ինքնաթիռով:
Սա անհուսությունից դրդված արտագաղթ է՝ սոցիալական արտագաղթ չէ: Արտագաղթի տեմպերը հատկապես ավելացան ինագուրացիայից հետո. մի մասն, իհարկե, արտագնա աշխատանքի գնացողներն են, բայց արտագաղթը նոր թափ է ստացել ընտրություններից հետո: Եթե այս գործընթացը շարունակվի, մի քանի տարի հետո Հայաստանում չի մնա հարկատու, երիտասարդ, աշխատող: Սա ինձ համար թիվ մեկ խնդիրն է, և կարևոր չէ՝ ես ընդդիմադիր եմ, թե իշխանամետ: Ո՞ւմ է պետք դա, երբ երկիրը դատարկվում է»,- ասաց Մանուկյանը:
ՀԱԿ պատգամավորը, անդրադառնալով մայիսի 5-ին կայանալիք ընտրություններին, նշեց, որ մեր հարստությունն է այն հասարակությունը, որը չի վախենում իշխանությունից և գալիք ընտրություններին վախի մթնոլորտում նրանց չի քվեարկի. «Չորս քաղաքական ուժ կա Երևանում, որի միասնական աշխատանքով հնարավոր է Երևանում իշխանությունը վերցնել Հանրապետականից:
Հայաստանի քաղաքականությունը եփվում է Երևանում, և եթե լուծենք այդ խնդիրը, շատ արագ իշխանափոխության կհասնենք, որովհետև Երևանը իշխող է, թելադրող, դոմինանտ: Վերջին ընտրությունների ընթացքում քաղաքացիները իրենց շատ լավ պահեցին, այստեղ կեղծելը շատ ավելի դժվար է: Որոշ հեռու շրջաններում ճնշում կա, բայց կենտրոնում, օրինակ՝ Արաբկիրում քաղաքացուն ճնշել չեն կարող»,- վստահեցրեց Արամ Մանուկյանը:
