Ադրբեջանի մայրաքաղաք Բաքվում ոստիկանությունը խափանել է ակցիան՝ նվիրված Ադրբեջանի նավթային պետական ակադեմիայում զանգվածային սպանության չորրորդ տարելիցին՝ հաղորդում է «Կավկազսկի ուզել»-ը:
Հրաձգության զոհերի հիշատակին նվիրված միջոցառումը պետք է կայանար ապրիլի 30-ին: Ակտիվիստներն իրենց գործողությունները համակարգել էին Facebook սոցիալական ցանցի միջոցով: Նրանք մտադիր էին Ջաֆար Ջաբարլիի հուշարձանի մոտից շարժվել ակադեմիա և ծաղիկներ դնել շենքի մոտ:
Ոստիկանությունը խիստ վերահսկողության տակ է վերցրել Ջաբարլիի հուշարձանի մոտ գտնվող տարածքը: Իրավապահ մարմինները խոչընդոտել են ակտիվիստների հավաքը: Շրջափակվել են նաև ակադեմիա տանող հետիոտնի համար նախատեսված ճանապարհները:
Contact.az-ի փոխանցմամբ՝ ոստիկանությունը ձերբակալել է «Ադրբեջանի ազգային ճակատ» երիտասարդական կոմիտեի առաջնորդին և NIDA շարժման անդամներից մեկին:
Հիշեցնենք. 2009թ. ապրիլի 30-ին ծնունդով Վրաստանից Ֆարդ Գադիրովը մտնելով ակադեմիայի շենք՝ սպանել է 12, վիրավորել 13 մարդու, այնուհետև ինքնասպան եղել:
