Ռուսական Независимая газета-ի փոխանցմամբ, Եվրոպայի և Եվրասիայի հարցերով ԱՄՆ փոխպետքարտուղարի օգնական Թինա Քեյդենաուն իր հարավկովկասյան շրջագայության շրջանակներում արդեն ավարտել է վրացական ու ադրբեջանական այցերը և այժմ գտնվում է Հայաստանում:
Հարավային Կովկասի երեք երկրներում էլ Քեյդենաուի ծրագրում են ընդգրկվել իշխանության ներկայացուցիչների, ազդեցիկ ընդդիմադիր գործիչների ու ազդեցիկ հասարակական կազմակերպությունների հետ հանդիպումներ ունենալը:
Դրանց արդյունքում Քեյդենանուն պետք է ծանոթանար Հարավային Կովկասում ընթացող ժողովրդավարական գործընթացներին: Դա փորձագետներին հիմք է տվել զուգահեռներ անցկացնելու Հարավային Կովկասի և Մերձավոր Արևելքի ու Հյուսիսային Աֆրիկայի միջև, ուր տիրում է ներքաղաքական լարված իրավիճակ: Խոսակցություններ են շրջանառվում, որ անհանգիստ Հարավային Կովկասի երեք երկրների ներքաղաքական արենայում կարող են գրանցվել լուրջ փոփոխություններ:
Եթե Հայաստանում ու Վրաստանում բողոքի ակցիաներն ընդհանուր առմամբ դարձել են սովորական երևույթ, ապա նույնը չի կարելի ասել Ադրբեջանի մասին, ուր ընդդիմությունը նույնպես ոտքի է ելել: Հենց դրա համար էլ Կոսովոյում ԱՄՆ նախկին դեսպան, դեմոկրատական արժեքների խնամակալ (Կոսովոյի անկախության գլխավոր ճարտարապետներից) Թինա Քեյդենաուի այցը տարածաշրջան հիմք է դրել Հարավային Կովկասում «գունավոր հեղափոխությունների» սկսման մասին լուրերին:
Դա առավել է ընդգծվում, երբ հաշվի է առնվում այն, որ Քեյդենաուն Բաքվից Թբիլիսի է մեկնել Ադրբեջանում ԱՄՆ դեսպան Մեթյու Բրայզայի ուղեկցությամբ: Վերջինս Քեյդենաուի տարածաշրջանային այցի կապակցությամբ էլ առաջ էր քաշել Թբիլիսիում Հարավային Կովկասի երկրներում ամերիկյան դեսպանների հավաքի գաղափարը:
Սակայն Հայաստանում ԱՄՆ դեսպան Մարի Յովանովիչը չմասնակցեց դրան` գործուղելով իր տեղակալ Բրյուս Դոնահյուին:
Ի դեպ, Յովանովիչը մինչ այդ եղել է Ղրղզստանում ԱՄՆ դեսպանը, և նրա անունը մեկ անգամ չէ, որ շոշափվել է այնտեղ տեղի ունեցած «կակաչների հեղափոխության» առնչությամբ:
Ուշագրավն այն է, որ հինգշաբթի օրը տեղի ունեցավ Հայաստանի ընդդիմության հերթական բազմահազարանոց ակցիան: Ներքաղաքական իրավիճակի լարվածության ցուցանիշով Հայաստանը գերազանցում է հարևան Վրաստանին ու Ադրբեջանին:
Չորեքշաբթի օրը Հայաստանի նախագահ Սերժ Սարգսյանն արտոնեց Ազատության հրապարակում հանրահավաքի անցկացումը, որի արգելքը գործում էր 2008 թվականի մարտի 1-2-ի աղետալի դեպքերից, երբ սպանվեց 10 մարդ: Դրանով նա վերացրեց ընդդիմադիրներին զայրացնող գլխավոր գործոններից մեկը:
Դժվար է ասել, թե Թբիլիսիում ինչի մասին են խոսել ամերիկյան դիվանագետները (Բրայզայի խոսքերով, կարծիքներ են փոխանակել Հարավային Կովկասում տիրող իրավիճակի շուրջ), փոխարենը Քեյդենանուն չի թաքցնում իր գործուղման նպատակները: Ի տարբերություն Բաքվի` Քեյդենանուն Թբիլիսիում հանիպումներ ունեցավ ազդեցիկ ընդդիմադիր գործիչների հետ` նրանց հետ քննարկելով 2012 թվականի խորհրդարանական և 2013 թվականի նախագահական ընտրությունները: Դրանով նա լավ ոգևորեց Վրաստանի նախագահ Միխեիլ Սաակաշվիլիի հակառակորդներին:
Ժողովրդավարական պետություն տեսնելու ԱՄՆ ցանկության մասին Քեյդենանուն հայտարարել էր նաև Բաքվում և, ամենայն հավանականությամբ, կհայտարարի Երևանում նույնպես»: