Ապրիլի 29-ին ՀՀ ԱԳ նախարար Էդվարդ Նալբանդյանը հանդիպեց Եվրոպական Միության ընդլայնման և եվրոպական հարևանության քաղաքականության հարցերով հանձնակատար:
Ողջունելով հյուրին՝ նախարար Նալբանդյանը նշեց, որ մերձեցումը Եվրոպական ընտանիքի հետ ՀՀ արտաքին քաղաքականության առանցքային ուղղություններից է և գոհունակությամբ ավելացրեց, որ այդ համագործակցությունը տարեցտարի առավել ընդլայնվում և ամրապնդվում է:
Հանձնակատար Ֆյուլեն իր հերթին ևս գոհունակություն հայտնեց ԵՄ -Հայաստան դինամիկ զարգացող հարաբերությունների առնչությամբ և ասաց, որ «Արևելյան գործընկերության» նախաձեռնության մեկնարկով Հայաստանի և ԵՄ հարաբերությունները դուրս եկան որակական նոր մակարդակի:
Զրուցակիցները հանգամանալից անդրադարձան Եվրոպական հարևանության քաղաքականության և Արևելյան գործընկերության շրջանակներում իրականացվող ծրագրերին և դրանց ներուժի ամբողջական օգտագործմանը:
Նախարար Նալբանդյանը նշեց, որ Հայաստանի և Եվրոպական միության միջև կանոնավոր քաղաքական երկխոսությունը, պարբերական բնույթ կրող բարձրաստիճան փոխայցելությունները, առևտրատնտեսական կապերի զարգացմանն ուղղված համատեղ ջանքերը նպաստում են համակողմանի փոխգործակցության խորացմանը:
Կողմերն անդրադարձան նաև Ասոցացման համաձայնագրի բանակցություններին և գոհունակությամբ նշեցին բանակցությունների ներկա փուլի հաջող ընթացքի մասին:
Էդվարդ Նալբանդյանն ու Շտեֆան Ֆյուլեն հանգամանալից մտքեր փոխանակեցին մուտքի արտոնագրային ռեժիմի դյուրացման և խորը և համապարփակ ազատ առևտրի գոտու հաստատման վերաբերյալ բանակցությունների մեկնարկի նախապատրաստական աշխատանքների վերաբերյալ:
Բանակցությունների օրակարգում էին Հայաստանում ընթացող բարեփոխումների ընթացքը և այդ ուղղությամբ ձեռնարկվող քայլերը:
Արցախյան հիմնախնդրի կարգավորման գործընթացի վերաբերյալ քննարկումների ընթացքում երկուստեք շեշտվեց, որ միջազգային իրավունքի սկզբունքների հիման վրա հիմնահարցի խաղաղ, բանակցային կարգավորումը այլընտրանք չունի:
Հանդիպմանը հաջորդեց Էդվարդ Նալբանդյանի և Շտեֆան Ֆյուլեի մամուլի ասուլիսը:
