Այսօր շատերը Սիրիայի ողջ տարածքում սպասում են նոր բախումների: Արդեն մի քանի շաբաթ է, ինչ ամեն ուրբաթ աղոթքից հետո սիրիացիները ցույցեր են կազմակերպում, երթերով անցնում քաղաքների փողոցներով:
Այսօր «Մուսուլման եղբայրներ» խմբավորումը, որը տասնյակ տարիներ եղել է Ասադների ընտանիքի հիմնական հակառակորդներից, կոչ է արել սիրիացիներին գրավել փողոցները` պաշտպանելու սեփական իրավունքները: «Թույլ մի՛ տվեք, որ ռեժիմը ճնշի ձեր համերկրացիներին: Միաձայն բարձրացրեք ձեր ձայնը հանուն ազատության և արժանապատվության: Թույլ մի՛ տվեք բռնակալներին ստրկացնել ձեզ: Ալլահ Աքբար»,- ասվում է խմբավորման հայտարարության մեջ: Այս մասին հաղորդում է Reuters գործակալությունը:
Շատերը նշում են, որ բողոքի ակցիաները սկսելուց ի վեր սա առաջին անգամ է, երբ «Մուսուլման եղբայրները», որի առաջնորդն արտաքսված է երկրից, հակակառավարական բողոքի կոչ է անում:
Տեղեկացնենք նաև, որ, ի տարբերություն իրավապաշտպանների, որոնք հայտարարել են ավելի քան 500 հաստատված զոհի մասին, Սիրիայի իշխանությունները հրապարակել են իրենց թվերը` 148 զոհ, որոնցից 78-ը իրավապահներ են:
