Գիտնականները պարզել են, թե ինչպես է փոխվում Լուսնի մթնոլորտն արևային ճառագայթման և ասուպային հոսքերի ժամանակ, հայտնում է ultramir.net-ը:
NASA-ի մասնագետներն ուսումնասիրել են արտաքին գործոնների ազդեցությունը Լուսնի էկզոսֆերայի` շատ բարակ և նոսր մթնոլորտի վրա, որը բնութագրիչ է Արեգակնային համակարգի համար: Այդպիսի մթնոլորտ ունեն Լուսինը, Մերկուրին, Մարսի արբանյակները և աստղակերպերը: Լուսնի մթնոլորտի մոլեկուլները տեղաբաշխված են այնքան բարակ, որ համարյա երբեք չեն հպվում:
Աստղագետները պարզել են, որ Լուսնի էկզոսֆերան Արևի ազդեցությունից և ասուպային անձրևներից սեղմվում և ընդարձակվում է: «Մենք կարողացել ենք տեսնել, թե ինչպես է շնչում Լուսինը»,- հայտարարել է ավագ հետազոտող դոկտոր Էնտոնի Կոլապրետեն:
Հասկանալու համար, թե էկզոսֆերան ինչպես է փոխազդում Լուսնի մակերևույթի հետ, հետազոտողները կենտրոնացել են նրա կազմում պարունակվող կալիումի և նատրիումի վրա: Դրանք էկզոսֆերայի միակ էլեմենտներն են, որ թողնում են բավարար լույս, ինչը հնարավորություն է տալիս նրանց հայտնաբերել գիտական սարքերի միջոցով: Գիտնականները հայտնաբերել են, որ ասուպային անձրևներից հետո այդ նյութերի մակարդակը կտրուկ աճում է: Սակայն նախկին մակարդակին վերադառնալը պահանջում է որոշակի ժամանակ:
Կոլապրետեն ենթադրում է, որ Արևի ուլտրամանուշակագույն ճառագայթներն ընդունակ են քայքայելու Լուսնի մակերևույթի և էկզոսֆերայի մասնիկների միջև որոշ կապեր: Մյուս կապերը քայքայելու համար պահանջվում է ալֆա մասնիկներ կամ բախում աստղակերպի հետ:
