Սերժ Սարգսյանի և Իլհամ Ալիևի հանդիպման ամենակարևոր ու միակ արդյունքը կարող է լինել նրանց հայտարարությունը՝ ԵԱՀԿ Մինսկի խմբի հովանու ներքո բանակցային գործընթացը շարունակելու մտադրության մասին: «Առաջին լրատվական»-ի հետ զրույցում այսպիսի կարծիք հայտնեց Մոսկվայի Կովկասագետների գիտական միության նախագահ, քաղաքագետ Ալեքսանդր Կռիլովը՝ խոսելով այսօր Բեռնում կայանալիք հանդիպման մասին:
Քաղաքագետի խոսքով՝ դժվար թե ինչ-որ ճեղքում լինի խաղաղ կարգավորման գործընթացում, քանի որ Բաքուն և Երևանը շարունակում են պահպանել իրենց կարծր դիրքորոշումը:
«Նախագահների նախորդ հանդիպումների արդյունքը այսպիսին է եղել, և առայժմ հիմքեր չկան ակնկալելու, որ ինչ-որ անսպասելի բան կարող է տեղի ունենալ: Նմանատիպ արդյունքները շատերի մոտ հիասթափություն են առաջացնում, ընդ որում՝ թե՛ Հայաստանում և թե՛ Ադրբեջանում: Սակայն երկու նախագահների հանդիպման որոշակի դրական ազդեցությունն այն է, որ նրանք նպաստում են որոշ ժամանակով լարվածության նվազեցմանը շփման գծում: Իսկ ընդհանուր առմամբ՝ խաղաղության գործընթացը կմնա փակուղում այնքան ժամանակ, քանի դեռ հակամարտող կողմերը «բավարար քաղաքական կամք չեն դրսևորել խաղաղության հասնելու համար»: Եվ դա արդարացիորեն ընդգծված է Մինսկի խմբի հայտարարության մեջ»,- ասաց Ալեքսանդր Կռիլովը:
Մեր զրուցակիցը մեկնաբանեց նաև վերջին շրջանում մամուլում շրջանառվող տեղեկությունները, թե Ռուսաստանը Լեռնային Ղարաբաղի հակամարտության կարգավորման «գաղտնի ծրագիր» է նախապատրաստել՝ կարծիք հայտնելով, որ դրանք տիպիկ թերթային ստեր են, որոնք ակտիվորեն օգտագործում է Ադրբեջանը՝ փորձելով հնարավորինս փչացնել Հայաստանի և Ռուսաստանի հարաբերությունները. «Որոշ հայ քաղաքական գործիչներ, ովքեր սկզբունքորեն դեմ են Ռուսաստանի հետ համագործակցությանը՝ ներառյալ ռազմական ոլորտը, ևս օգտագործում են նմանատիպ ստահոդ լուրերը: Չնայած նման խոսակցությունների անհեթեթությանը՝ դրանց տարածումը լրատվամիջոցների կողմից իրական միջոց է դառնում Հայաստանի հասարակական տրամադրությունների վրա ազդելու համար: Ադրբեջանում էլ դրանք առաջացնում են ռազմատենչ տրամադրություններ և հույսեր, որ շուտով ԼՂՀ տարածքները կվերադարձվեն Ադրբեջանին»:
Այս տեղեկությունը տարածել էր ռուսական «Կոմերսանտ» թերթը՝ գրելով, որ այդ ծրագրի համաձայն՝ հայկական կողմն իբր Ադրբեջանին պիտի վերադարձնի Լեռնային Ղարաբաղի շրջակա տարածքների մեծ մասը, ինչի դիմաց Ադրբեջանն ընդամենը «պարտավորվում է չլուծել խնդիրը ռազմական ճանապարհով», բայց չի ճանաչում Լեռնային Ղարաբաղի անկախ կարգավիճակը:
