ՄԻ պաշտպան Արմեն Հարությունյանի կողմից ներկայացված «Հավաքների մասին» օրենքի նախագծի հրապարակային քննարկումներին հրավիրված էին նաեւ «Հանրապետություն» կուսակցության քաղխորհրդի անդամ, իրավապաշտպան Արտակ Զեյնալյանը եւ Հելսինկյան քաղաքացիական ասամբլեայի Վանաձորի գրասենյակի ներկայացուցիչ Արթուր Սաքունցը: Նրանք երկուսն էլ չէին ներկայացել քննարկմանը:
Արտակ Զեյնալյանը մեզ հետ զրույցում նշեց, որ խաղաղ հավաքների ազատությունը Հայաստանում երաշխավորված չէ` անկախ դրանից դա գրված է, թե գրված չէ, պետք է ապահովված լինի. «Դա մարդու անօտարելի իրավունքն է: Մարդիկ ուզում են իրենց դժգոհությունն արտահայտեն, իրենց ազատ արտահայտվելու իրավունքն իրացնում են խաղաղ հավաքի միջոցով եւ կարող են նաեւ բողոքի ցույց կազմակերպել միջազգային կազմակերպության կողմից անցկացվող համաժողովի անցկացման վայրի մոտ, դա լրիվ իրավաչափ է: Իսկ ոստիկանների գործողությունը ոչ իրավաչափ է, անկախ նրանից մենք օրենք ունենք ժողովների մասին, թե չունենք, նախագիծ քննարկվում է, չի քննարկվում եւ ով է դրա հեղինակը, միեւնույն է պետք է այդ իրավունքը պահպանվի: Այս իշխանությունները ուղղակկի վախենում են մարդկային դժգոհությունից, որը նաեւ դրսեւորվում է արտագաղթի ձեւով»:
