«Արվեստների պատկերասրահ» մշակութային հիմնադրամը` Հայաստանի հեռահաղորդակցության առաջատար ՎիվաՍել-ՄՏՍ-ի գլխավոր հովանավորությամբ և ՀՀ Մշակույթի նախարարության աջակցությամբ, ապրիլի 28-ից մայիսի 21-ը ներկայացնում է «Ազգային պատկերասրահ» միջազգային երաժշտական 9-րդ փառատոնը
Միջազգային համբավ ձեռք բերած «Ազգային պատկերասրահ» միջազգային երաժշտական փառատոնն արդեն իններորդ անգամ ներկայացնում է հայ և համաշխարհային դասական երաժշտարվեստի նմուշներ` հանրահայտ, ինչպես նաև Հայաստանում ճանաչում չունեցող հայ և օտարազգի տաղանդաշատ երաժիշտ-կատարողների, ստեղծագործական կոլեկտիվներ կատարմամբ: Փառատոնի առաքելությունը չի սահմանափակվում դասական երաժշտության պրոպագանդման, հայ կոմպոզիտորական և կատարողական արվեստի վերջին ձեռքբերումները ներկայացնելով: Այն հասարակության լայն շերտերին հնարավորություն տալիս է յուրահատուկ մթնոլորտում, երաժշտության ուղեկցությամբ դիտել պատկերասրահում գնտվող որմնանկարները:
Ականավոր երաժիշտ, կոմպոզիտոր, ԽՍՀՄ Ժողովրդական արտիստ, 2006-2012թթ. Փառատոնի գեղարվեստական խորհրդի նախագահ Էդվարդ Միրզոյանի հիշատակին նվիրված փառատոնի ծրագիրը բավականաչափ հագեցած է: Ելույթ կունենան Ջուլիետ Գալստյանը, մեցցո-սոպրանո /Շվեյցարիա/, դաշնակահարներ Սվետլանա Նավասարդյանը և Հայկ Մելիքյանը, պատանի տաղանդաշատ քանոնահար Նարեկ Կազազյանը, աշխարհահռչակ վիրտուոզ բալալայկահար Անդրեյ Գորբաչովը /Ռուսաստան/, Էդվարդ Միրզոյանի անվան նորաստեղծ Լարային Քառյակը, ֆլեյտահարուհի Սառա Ուռենան/Իսպանիա/, Ազգային օպերային թատրոնի մեներգիչներ Մարինե Դեինյանը/սոպրանո/, Արծվիկ Դեմուրչյանը/սոպրանո/, Դիանա Հարությունյանը /սոպրանո/, Պերճ Քարազյանը /տենոր/, Հայաստանի պետական կամերային նվագախումբը՝ Վահան Մարտիրոսյանի և Հարություն Արզումանյանի ղեկավարությամբ:
«Ազգային Պատկերասրահ» միջազգային երաժշտական փառատոնն իրականացվում է ՎիվաՍել-ՄՏՍ-ի ամենամյա /2006թ.-ից/ հովանավորության և հոգատարության շնորհիվ:
«Ողջունելի են բոլոր այն նախաձեռնությունները, որոնց հիմքում կարևոր տեղ է հատկացվում շնորհալի երիտասարդների ստեղծագործական ներուժի բացահայտմանը, դրա զարգացմանն ու կատարելագործմանը: Դա բխում է քաղաքակիրթ հասարակության շահերից և կարող է հրաշալի արդյունք արձանագրել, երբ գործի դրված ջանքերը լինեն հետևողական ու անկեղծ: Տարիների ընթացքում հաջողություններ արձանագրած և միջազգային համբավ ձեռք բերած այս փառատոնը դարձել է Հայաստանի մշակութային կյանքի կարևոր իրադարձություններից մեկը: Այն հրաշալի է նաև իր մատուցման ձևի մեջ: Արվեստի և երաժշտության համադրությունը նույնքան գեղեցիկ է, որքան բնությունն ինքը: «Ազգային պատկերասրահն» աշխարհն իրական գույներով տեսնելու և այն ավելի գունեղ դարձնելու միջոցներից մեկն է»,- ասել է ՎիվաՍել-ՄՏՍ-ի գլխավոր տնօրեն Ռալֆ Յիրիկյանը:
2008թ.-ից փառատոնն ընդգրկված է ՀՀ Մշակույթի նախարարության Պետական աջակցության ծրագրերի ցանկում:
