Հայաստանի ոստիկանապետի առաջին տեղակալ Հունան Պողոսյանը պնդում է, որ ոստիկանությունը կատարել է Վլադիմիր Գասպարյանի հրահանգը և լուրջ, անտեսանելի աշխատանք տանելով՝ հանրաքվեի օրը կանխարգելել է քրեական տարրերի, թաղային հեղինակությունների ներկայությունը տեղամասերի դիմաց և նրանց մասնակցությունը հանրաքվեի գործընթացին։
Ասուլիսին ներկա անձնագրային և վիզաների վարչության պետ Մնացական Բիչախչյանը անդրադարձավ հանրաքվեի օրը 9-րդ ձև համարվող փաստաթղթով քվեարկության դեպքերին և դրա վերաբերյալ ընդդիմության պնդումներին։
Բիչախչյանը հայտարարեց, որ այդպիսի փաստաթուղթ ամբողջ հանրապետության տարածքով տրամադրվել է միայն 146 9-րդ ձև, որի վրա եղել է անձի տվյալները, այդ թվում քաղաքացու լուսանկարը։ Առանց լուսանկարի 9-րդ ձևերը անօրինական փաստաթղթեր են եղել։
Փոխոստիկանապետ Հունան Պողոսյանը անդրադարձավ նաև վարչապետ Հովիկ Աբրահամյանի՝ իշխանություններին արջի ծառայություն մատուցելու վերաբերյալ պնդումներին։ Հունան Պողոսյանն անգամ անուններ հրապարակեց, թե ովքեր են եղել «Ոչ»-ի ճամբարին արջի ծառայություններ մատուցողները՝ Վարդգես Գասպարի, Հակոբ Դեխնավի։ Փոխոստիկանապետը, սակայն, ձեռնպահ մնաց «Այո»-ի ճամբարին արջի ծառայություն մատուցածների անուններ հրապարակելուն։
Ամեն դեպքում փոխոստիկանապետ Հունան Պողոսյանը վստահորեն կարծիք հայտնեց, որ հանրաքվեի օրը իրականացված խախտումները չէին կարող ազդեցություն ունենալ վերջնական արդյունքների վրա, քանի որ խախտումները, փոխոստիկանապետի խոսքով, եղել են սահմանափակ թվով տեղամասերում։
